66903

सिंधुदुर्गात ओला दुष्काळ जाहीर करा
युवासेनेची मागणीः कणकवली तहसीलदारांना दिले निवेदन
सकाळ वृत्तसेवा
कणकवली, ता. २९ः सिंधुदुर्गात सतत पाऊस होत असल्‍याने भात पेरणीची कामे रखडली आहेत. पुढील काळात पावसाचा जोर कायम राहिला तर शेतीचा हंगाम वाया जाण्याची भीती आहे. त्‍यामुळे सिंधुदुर्गात ओला दुष्काळ जाहीर करा आणि शेतकऱ्यांना नुकसान भरपाई द्यावी अशी मागणी युवासेनेच्यावतीने करण्यात आली. याबाबतचे निवेदन तहसीलदार दीक्षांत देशपांडे यांना देण्यात आले.
युवासेना जिल्‍हाप्रमुख सुशांत नाईक यांच्यासह राजू राठोड, तालुकाप्रमुख उत्तम लोके आदींनी आज तहसीलदार दीक्षांत देशपांडे यांची भेट घेतली. यावेळी त्‍यांनी शेतकऱ्यांना नुकसान भरपाई देण्याची मागणी केली. तसेच याबाबतचे निवेदनही त्‍यांना दिले.
श्री. नाईक म्‍हणाले की, मान्सूनपूर्व सरी कोसळल्‍यानंतर शेतकरी भात पेरणी करतात. मात्र यंदा सलग आठ दिवस अवकाळी पाऊस झाला. त्‍यानंतर आता मान्सून सरी कोसळत आहेत. सततच्या पावसामुळे जमिनीतून झरे वाहू लागले आहेत. अशा पाणथळ जमिनीमध्ये भात पेरणी शक्‍य नाही. जर सलग आठ दिवस पाऊस थांबला, तरच यातून काहीतरी मार्ग निघू शकतो. मात्र सध्या पाऊस थांबलेला नाही.
ते म्‍हणाले की, अवकाळी पावसामुळे जिल्ह्यातील भात शेतकऱ्यांचे मोठे नुकसान झाले आहे. पुढील काही दिवस असाच पाऊस सुरू राहिला तर यंदा शेतकऱ्यांना भात पेरणीची शक्‍य होणार नाही. त्‍यामुळे संपूर्ण भातशेती हंगाम वाया जाणार आहे. याखेरीज पुढील पंधरा दिवसांत भात पेरणीची कामे झाली तरीही शेतकऱ्यांना अपेक्षित भात उत्‍पादन मिळण्याची खात्री नाही. त्‍यामुळे सर्व शेतकऱ्यांच्या शेतामध्ये जाऊन महसूल विभागाने पंचनामे करावेत आणि शेतकऱ्यांना भात पीक नुकसान भरपाई देण्यात यावी.
नाईक म्‍हणाले की, सिंधुदुर्गातील भात उत्‍पादक शेतकऱ्यांच्या या समस्यांबाबत आम्‍ही राज्यपातळीवर ही दाद मागणार आहोत. नुकतीच जिल्ह्यात आपत्ती व्यवस्थापनाची बैठक झाली. या बैठकीत सिंधुदुर्गसह कोकणात ओला दुष्‍काळ जाहीर करण्याची मागणी पालकमंत्री नितेश राणे यांच्याकडून करण्याची गरज होती. परंतु या विषयाचे गांभीर्य त्‍यांना नाही. मात्र विरोधी पक्षाच्या माध्यमातून इथल्‍या शेतकऱ्यांचा आवाज आम्‍ही विधीमंडळात उठविणार आहोत.
यावेळी शिवसेना ठाकरे गटाचे उपजिल्हाप्रमुख राजू शेट्ये, युवा सेना तालुकाप्रमुख उत्तम लोके, राजू राठोड, प्रदीप सावंत, रोहित राणे, महेश कोदे, धीरज मेस्त्री, प्रतीक रासम, आशिष मेस्त्री, अजित काणेकर, आदित्य पालव, वेदांत शिवगण, जयराम शेट्ये, उद्धव पारकर, लक्ष्मण हान्नीकोळ आदी उपस्थित होते.