सिंधुदुर्ग-हैदराबाद, बंगळूर
विमानसेवा ११ जूनपासून

‘फ्लाय ९१’तर्फे बुकिंग सेवा उपलब्ध

सकाळ वृत्तसेवा
म्हापण, ता. ३१ ः ‘फ्लाय ९१’ कंपनीची सिंधुदुर्ग-हैदराबाद आणि बंगळूर विमान फेरी ११ जूनपासून सुरू होणार आहे. कंपनीतर्फे प्रवाशांना विमानसेवेची बुकिंग सुविधा उपलब्ध करून दिली आहे. लवकरच या दोन सेवा सुरू होतील. त्यामुळे प्रवाशांना लाभ होणार आहे.
सिंधुदुर्ग विमानतळावर सध्या या कंपनीची सिंधुदुर्ग-पुणे विमान फेरी आठवड्यातून पाच दिवस सुरू आहे. त्यातच कंपनीकडून हैदराबाद आणि बंगळूर सेवा सुरू करण्यात येणार आहेत. त्यामुळे प्रवाशांना या दोन विमान फेऱ्यांचा लाभ घेता येणार आहे. सिंधुदुर्ग विमानतळावर विमानसेवा सिग्नल व्यवस्था आता सक्षम केली आहे. तेव्हा, आता वातावरणातील बदलामुळे निर्माण होणाऱ्या अडचणी येत नाहीत. त्यामुळे प्रवाशांना त्रास होणार नाही. लवकरच सिंधुदुर्ग-मुंबई विमान सेवा सुरू झाली तर प्रवासी वर्गाला मोठा लाभ होऊ शकतो. ‘फ्लाय ९१’च्या अधिकृत संकेतस्थळावर हैदराबाद आणि बंगळूर सेवा बुकिंग सुरू झाले आहे. याचे तिकीट २४९१ रुपये असणार आहे. आठवड्यातून चार दिवस या सेवा असतील, असे कंपनीकडून जाहीर करण्यात आले.