- rat३१p६.jpg -
P२५N६७२७८
राजापूर ः मुंबई-गोवा महामार्गावर राजापूर एसटी डेपोसमोर पाहणी करताना आमदार किरण सामंत.
---
राजापूर डेपोसमोरील वाहतुकीचा प्रश्न सोडवणार
किरण सामंत ः खासदार नारायण राणेंबरोबर सकारात्मक चर्चा
सकाळ वृत्तसेवा
राजापूर, ता. ३१ ः मुंबई-गोवा महामार्गावर राजापूर एसटी डेपोसमोरील पुलाबाबत व वाहतूक प्रश्नाबाबत खासदार नारायण राणे यांच्यासोबत चर्चा करून हा प्रश्न मार्गी लावणार असल्याची ग्वाही आमदार किरण सामंत यांनी दिली.
शहरातील राजापूर एसटी डेपोसमोरील महामार्गावरील उड्डाणपूल आणि सेवारस्त्याचे अद्यापही काम प्रलंबित राहिलेले आहे. त्यामुळे या भागामध्ये अपघात होण्याची शक्यता असल्याने प्रलंबित असलेले काम मार्गी लावण्याची मागणी राजापूरवासियांनी केली आहे. त्यानुसार आमदार सामंत यांनी तेथील पाहणी केली. या वेळी पोलिस निरीक्षक अमित यादव, भाजप जिल्हा सरचिटणीस रवींद्र नागरेकर, शिवसेना तालुकाप्रमुख दीपक नागले, प्रकाश कुवळेकर, विवेक गुरव, अरविंद लांजेकर, महेश मयेकर, भरत लाड, रवींद्र बावधनकर, सौरभ खडपे आदींसह अधिकारी उपस्थित होते.
महामार्गावरील राजापूर एसटी डेपोसमोरील वाहतूक प्रश्‍न, या ठिकाणी पलिकडे बंगलवाडी भागाकडे जाण्यासाठी असलेली पुलाची मागणी याबाबत आमदार सामंत यांनी स्थानिकांची मागणी व प्रश्न ऐकून घेतले. मुंबई-गोवा महामार्गासंबधित प्रश्नांबाबत खासदार नारायण राणे हे सातत्याने पाठपुरावा करत आहेत. त्यामुळे राजापूर एसटी डेपोसमोरील वाहतुकीचा प्रश्न व पुलाची मागणी याबाबतही खासदार राणे यांनी विस्तृत माहिती घेतलेली आहे. खासदार राणे राजापुरात येत असून, या वेळी त्यांच्यासोबत या भागाची पुन्हा पाहणी करून त्यांच्या मार्गदर्शन व सूचनेप्रमाणे प्रश्न निकाली काढला जाईल, असे आमदार सामंत यांनी आश्‍वासन दिले.