rat1p1.jpg-
67431
कोल्हापूर : बालचित्रकला स्पर्धेत भाव्या गुप्ता हिला बक्षीस देताना अभिनेता गश्मीर महाजनी. तर तिने साकारलेले चित्र दुसऱ्या छायाचित्रात.

बालचित्रकला स्पर्धेमध्ये
भाव्या गुप्ताला द्वितीय क्रमांक
सकाळ वृत्तसेवा
रत्नागिरी, ता. ३१ : सक्सेस अबॅकस अँड एज्युकेशन इंडिया या संस्थेमार्फत आयोजित राज्यस्तरीय बाल चित्रकला स्पर्धेत रत्नागिरीतील चित्रकार प्रांजल घोसाळे यांच्या कल्पकला चित्रकला क्लासमधील भाव्या दीपक गुप्ता हिने द्वितीय क्रमांक पटकावला.
भाव्या गुप्ता ही शहरातील ओ नेस्ट गुरुकुलमध्ये इयत्ता तिसरीत शिकत आहे. कोल्हापूर येथे आयोजित कार्यक्रमात अभिनेता गश्मीर महाजनी यांच्या हस्ते सन्मानचिन्ह प्रमाणपत्र आणि १५ हजार रुपयांचा धनादेश भाव्याला प्रदान करण्यात आला. आपल्या कला कौशल्याच्या माध्यमातून तिने हा सन्मान आणि सर्वांचे कौतुक मिळवले आहे.
याबाबत तिच्या आई-वडिलांशी बोलताना ते म्हणाले की, आमच्या मुलीला चित्रकलेची लहानपणापासूनच आवड होती, परंतु चित्रकार सौ. प्रांजल घोसाळे यांच्याकडे चित्रकला क्लासला घातल्यानंतर तिची ती आवड खूप वाढली. तिच्या चित्रकलेमध्ये फारच प्रगती दिसून आलेली आहे. या स्पर्धेबाबतची सर्व माहिती आणि तिला त्या यशापर्यंत पोहोचवण्याचे श्रेयही त्यांनी प्रांजल घोसाळे यांनाच दिले.
सौ. घोसाळे यांचे कल्पकला चित्रकला वर्ग शिवाजीनगर येथील ओनेस्ट गुरुकुल येथे दर रविवारी चालतात. मुलांची चित्रकलेची आवड वाढवून त्यांना चित्रकलेच्या परीक्षांचे मार्गदर्शन करण्याचे वर्ग त्या येथे चालवतात. या क्लासमध्ये काही नवशिक्या आणि चित्रकलेची आवड असलेल्या महिलाही सहभागी आहेत.