मच्छीमारीस १५ जूनपर्यंत परवानगी द्या
शाश्वत, पारंपरिक मच्छीमार ; खलाशांना पगार देणेही अशक्य
सकाळ वृत्तसेवा
रत्नागिरी, ता. २ ः वातावरणातील बदलांमुळे १० मे पासूनच रत्नागिरी ट्रॉलिंग फिशिंग पद्धतीने मासेमारी करणाऱ्या मच्छीमारांच्या नौका मासेमारीसाठी बंद ठेवण्यात आल्या आहेत. त्यामुळे शासनाने शाश्वत व पारंपरिक मच्छीमार नौकांसाठी अधिकृत १५ जूनपर्यंत परवानगी द्यावी, अशी मागणी संघटनेतर्फे करण्यात आली आहे.
येथील सहाय्यक आयुक्त मत्स्य व्यवसाय विभागाला शाश्वत व पारंपरिक मच्छीमार नौकामालक संघटनेतर्फे निवेदन देण्यात आले आहे. शासनाने घालून दिलेल्या नियमांचे पालन करून आजपर्यंत मच्छीमारी केली जात आहे. शासनाने या वेळी सहानुभूतीपूर्वक विचार करावा. नुकत्याच झालेल्या वादळी वातावरणामुळे वेळेआधीच नौका बंद ठेवाव्या लागल्या. त्यामुळे मच्छी व्यवसायाला फटका बसला आहे. ज्या नौका फिशिंग, ट्रॉलिंग पद्धतीने मासेमारी करत आहेत त्या नौकांवरती जे तांडेल, खलाशी व कामगार आहेत त्यांचे पगार देणेही शक्य झालेले नाही. या सर्व गोष्टींना बेकायदेशीररित्या चालू असलेले व शासनाचे सर्व नियम पायदळी तुडवून मासेमारी करत असलेले पर्ससीननेट, मिनी पर्ससीन (यामा मशिनद्वारे) नेट तसेच एलईडी मासेमारी कारणीभूत आहे. या सर्व विषयांना शासनाने गांभीर्यपूर्वक विचार करून न्याय द्यावा तसेच १५ दिवस मच्छीमारी करण्यासाठी परवानगी द्यावी, अशी मागणी निवेदनाद्वारे केली आहे. काही वर्षांपूर्वी मासेमारी बंदी काळ १० जून ते १५ ऑगस्ट किंवा नारळी पौर्णिमेपर्यंत होता. तशीच व्यवस्था पुन्हा करावी, अशी मागणी मच्छीमारांनी केली आहे. हे निवेदन शाश्वत व पारंपरिक मच्छीमार नौकामालक संघटनेचे रणजीत भाटकर, शंकर शिवलकर, सचिन टाकळे, दिनेश सावंत, रोहिदास पारकर, विनायक मयेकर, संजय विलणकर, समीर शेट्ये, वैभव बोरकर, महमन शफी दा. साखरकर, संजय विलणकर, ओमकार बिरजे, अमर पवार, शुभम पाटील, दिलीप सुर्वे, अमोल भोंगले यांनी दिले आहे.