swt23.jpg
67663
पुणे : महाराष्ट्र वीज कंत्राटी कामगार संघाच्या केंद्रीय कार्यकारिणी बैठकीत राजेंद्र पवार यांचा सत्कार करण्यात आला.

वीज कंत्राटींच्या समस्यांवर तोडगा काढू
राजेंद्र पवार : पुण्यातील केंद्रीय कार्यकारिणी बैठकीत ग्वाही
सकाळ वृत्तसेवा
कुडाळ, ता. २ः वीज कंत्राटी कामगारांच्या समस्यांवर लवकरच तोडगा काढला जाईल, असे प्रतिपादन महावितरण संचालक राजेंद्र पवार यांनी संघटनेच्या केंद्रीय कार्यकारिणी बैठकीत केले.
महाराष्ट्र वीज कंत्राटी कामगार संघाच्या केंद्रीय कार्यकारिणीची बैठक ३१ मे व १ जून या कालावधीत पुणे येथे विश्वकर्मा भवनात पार पडली. या बैठकीला राज्यभरातील २८ जिल्ह्यांतील पदाधिकारी उपस्थित होते. या बैठकीत महावितरणच्या मानव संसाधन विभागाचे संचालक श्री. पवार यांनी विशेष उपस्थिती दर्शवून कामगारांच्या अडचणी ऐकून घेतल्या. वीज कंपनीच्या उन्नतीमध्ये कंत्राटी कामगारांचा मोठा वाटा असून, कंत्राटदारांकडून त्यांना होणाऱ्या अन्यायातून मुक्त करण्यासाठी महावितरणकडून ठोस पावले उचलण्यात येतील, असे आश्वासन त्यांनी दिले.
बैठकीत भारतीय मजदूर संघाचे महाराष्ट्र व गोवा प्रभारी सी. व्ही. राजेश यांचीही उपस्थिती होती.
संघाचे प्रदेश अध्यक्ष नीलेश खरात यांनी बैठकीत नमूद केले की, ''ऊर्जामंत्री देवेंद्र फडणवीस यांनी ऑगस्ट २०२४ मध्ये ४२,००० कंत्राटी वीज कामगारांसाठी जाहीर केलेले लाभ अजून प्रत्यक्ष अमलात आलेले नाहीत. प्रशासनाने अद्याप त्या निर्णयांची अंमलबजावणी न केल्यामुळे शेवटच्या कामगारापर्यंत लाभ पोहोचलेले नाहीत. प्रशासन आर्थिक हितसंबंधांमुळे दोषी कंत्राटदारांना पाठीशी घालत आहे का?, असा प्रश्न उपस्थित करत यामुळे ऊर्जामंत्र्यांची प्रतिमा मलिन होत असल्याचे त्यांनी स्पष्ट केले. संघाचे प्रदेश सरचिटणीस सचिन मेंगाळे यांनी, जर कामगारांच्या मागण्यांकडे सरकारने गांभीर्याने लक्ष दिले नाही, तर येत्या ३० जूनपासून सुरू होणाऱ्या पावसाळी अधिवेशनादरम्यान राज्यव्यापी आंदोलन छेडण्यात येईल, असा इशारा दिला.
या बैठकीत प्रमुख मागण्या मांडण्यात आल्या. यामध्ये ई.एस.आय. (कर्मचारी राज्य विमा योजना) अंतर्गत वेतन मर्यादेत वाढ करून अधिक कामगारांना या योजनेचा लाभ मिळावा, वीज क्षेत्रातील कामगारांसाठी धोकादायक काम म्हणून घोषित करून स्वतंत्र वेतन अधिनियमांतर्गत विशेष सुरक्षा लाभ त्वरित लागू करावेत, या मागण्यांचा समावेश आहे.
बैठकीचा समारोप करताना कंत्राटी कामगार, शोषणमुक्त कामगार याकरिता संघर्ष करण्याचे आवाहन संघटनेचे सचिव श्री. राजेश यांनी केले. आभार सागर पवार यांनी मानले.

चौकट
‘संदेश यात्रे’द्वारे जागृती अभियान
भारतीय मजदूर संघाच्या ७० व्या वर्धापन दिनानिमित्त ‘कंत्राटी कामगार संदेश यात्रा’ देशभरात राबविली जाणार आहे. या मोहिमेअंतर्गत विविध क्षेत्रांतील कंत्राटी कामगारांशी थेट संपर्क साधून मेळावे व संवाद सत्र आयोजित केले जातील. वीज, जलसंपदा, आरोग्य, परिवहन, बांधकाम यांसारख्या क्षेत्रांतील कामगारांमध्ये संघटनात्मक बळकटी आणि हक्कांविषयी जागृती हे या उपक्रमाचे उद्दिष्ट असेल.