जयवेद धामणाक याचा सत्कार
संगमेश्वर ः तालुक्यातील कडवई धामणाकवाडीचा सुपुत्र जयवेद धामणाक याने प्रज्ञाशोध परीक्षेत संगमेश्वर तालुक्यात दुसरा, जिल्ह्यात नववा आणि राज्यात बारावा क्रमांक प्राप्त केला. जयवेदच्या यशाबद्दल स्वराज्य संस्थेच्या कोकण विभागाचे अध्यक्ष अविनाश गुरव यांनी घरी जाऊन यथोचित सन्मान केला. या वेळी माजी तंटामुक्ती अध्यक्ष राज बोथरे, हर्षद घोसाळकर, प्रथमेश कडवईकर, चैतन्य रेडीज, अमेय सुर्वे आदी उपस्थित होते.

अनारीत गुणवंत विद्यार्थ्यांचा सत्कार
चिपळूण : हनुमान समाजसेवा मंडळ (मुंबई- पुणे-अनारी) यांच्या संयुक्त विद्यमाने यावर्षी अनारी गावातील १० वी आणि १२ वीमध्ये उत्तीर्ण झालेल्या विद्यार्थ्यांचा आज अनारी गावातील हनुमान मंदिरामध्ये गावातील मान्यवरांच्या हस्ते सत्कार करण्यात आला. शासनाच्या राष्ट्रीय आर्थिक दुर्बल घटक सारथी शिष्यवृत्ती परीक्षेमध्ये विशेष प्रावीण्य मिळवलेल्या अनारी गावातील चिन्मय दळवी या विद्यार्थ्याचा हनुमान समाजसेवा मंडळातर्फे सत्कार करण्यात आला. हनुमान समाजसेवा मंडळ (मुंबई)चे अध्यक्ष संदेश पवार, स्थानिक अध्यक्ष प्रमोद पवार, सरपंच सदानंद पवार, उपसरपंच वेदांती पवार आदी उपस्थित होते.

सत्यसाईबाबा यांच्या पादुकांचे आगमन
रत्नागिरी ः श्री सत्यसाईबाबा पुट्टपर्ती, आंध्र प्रदेश यांच्या जन्मशताब्दी वर्षाच्या निमित्ताने जगभर विविध कार्यक्रमांचे आयोजन करण्यात आले आहे. या कार्यक्रमांचा एक भाग म्हणून श्री सत्यसाईबाबांच्या पादुका असलेले सहा रथ पुट्टपर्तीहून सर्व भारतामध्ये दर्शनासाठी निघाले आहेत. त्यातील एक रथ गोवा राज्यात भ्रमण करून गुरुवारी (ता. ५) व शुक्रवारी (ता. ६) शहरातील पॉवरहाऊस येथील श्री गजानन महाराज मंदिरात दर्शनासाठी येणार आहेत. गुरुवारी (ता. ५) संध्याकाळी पाच वाजता रत्नागिरीत आगमन होणार आहे. संध्याकाळी ६ ते ९ या वेळेत भजन होणार आहे. ६ ला प्राध्यापक-भौतिकशास्त्र मुंबई विद्यापीठ प्रो. सिद्धार्थ कस्तुरीरंग यांचे श्री सत्यसाईबाबांचे विचार व शिकवण या विषयावर संध्याकाळी सहा ते साडेसातला व्याख्यान होणार आहे. साडेसात ते साडेनऊ या वेळेत मराठी भक्तिगीतांचा कार्यक्रम होणार आहे. शुक्रवारी संध्याकाळी साडेसातपासून महाप्रसादाचे आयोजन करण्यात आले आहे.