रत्नागिरी एसटी विभागात ९४० पदे रिक्त
चालक-वाहकांची कमतरता ; नोकर भरतीअभावी कामाचा ताण
सकाळ वृत्तसेवा
रत्नागिरी, ता. २ : एसटी महामंडळाच्या सर्वच विभागांमध्ये पदे रिक्त आहेत. पुरेसे कर्मचारी नसल्यामुळे असलेल्यांवर कामाचा ताण येत आहे. जिल्ह्यात सध्या सर्व आगार, कार्यशाळा, कार्यालयातील कामकाजात ९४० पदे रिक्त आहेत. राज्यभरात अशीच स्थिती आहे. एखाद्या कर्मचाऱ्याच्या निवृत्तीनंतर पुन्हा त्या पदावर भरती होत नसल्याने नोकरभरतीचा प्रस्ताव महामंडळाने मंजुरीसाठी शासनाकडे पाठवला आहे; परंतु अद्याप त्यावर निर्णय झालेला नाही.
पूर्वी एसटीची आर्थिक परिस्थिती लक्षात घेऊन एसटीतील नोकर भरतीला २०२४ पर्यंत उच्च न्यायालयाने मनाई केली होती. येत्या काही वर्षामध्ये निवृत्त होणाऱ्या कर्मचाऱ्यांची संख्या जास्त आहे. या कर्मचाऱ्यांसह अभियंत्यांची रिक्त पदे करार पद्धतीने आणि सरळसेवा भरतीच्या माध्यमांतून भरण्यात येणार आहे.
भविष्यात २५ हजार एसटी बस राज्यात येणार आहेत. त्यामुळे चालक, वाहकासह अन्य पदांची गरज भासणार आहे. रत्नागिरी जिल्ह्यातील सर्वच आगारात मिळून ९४० पदे रिक्त आहेत. त्यामध्ये चालक-वाहकांची संख्या अधिक आहे. त्यामुळे इतर चालक-वाहकांवर जास्त भार येत आहे. तसेच बऱ्याचदा गर्दीच्या हंगामात डबल ड्युटी करावी लागत आहे. लिपिक, यांत्रिक, वाहतूक नियंत्रक यांची पदेही रिक्त आहेत. प्रत्येक जिल्ह्यातील रिक्त पदांचा आढावा घेऊन आवश्यक पदभरतीसंदर्भात मागणी करण्याच्या सूचना परिवहनमंत्र्यांनी दिल्या आहेत. नोकरभरतीचा मार्ग मोकळा झाल्यास बेरोजगार युवकांचे लक्ष लागले आहे.
रत्नागिरीत नोकऱ्या नसल्यामुळे कित्येक चाकरमानी मुंबई, पुणे यासह विविध शहरात जाऊन नोकरी करतात. सण, उत्सवाच्या काळात घरी येतात. त्यामुळे त्यांची मोठी ओढाताण होते. नोकरभरती जाहीर झाल्यास त्यात भूमीपुत्रांना स्थान द्यावे, अशी मागणी अनेक बेरोजगारांनी केली आहे.
-----
रिक्त पदे
चालक, वाहक - ५४५
लिपिक - ५०
यांत्रिक - ३२०
वाहतूक नियंत्रक - २५
------------
एकूण- ९४०
-----------
कोट
नोकर भरतीसंदर्भात महामंडळ स्तरावर निर्णय होत असतो. अद्याप तरी अशी कोणतीही भरती नाही. रत्नागिरी विभागात सर्वच आगारात चालक-वाहकांसह विविध पदे रिक्त आहेत. नोकर भरती झाल्यास रिक्त पदे भरण्यात येतील.
--प्रज्ञेश बोरसे, विभाग नियंत्रक.