शासकीय वसतिगृहात
मोफत प्रवेशाची संधी
सिंधुदुर्गनगरी : सहायक आयुक्त समाज कल्याण कार्यालयांतर्गत मुला-मुलींच्या शासकीय वसतिगृहासाठी डॉ. बाबासाहेब आंबेडकर मागासवर्गीय मुलांचे शासकीय वसतिगृह, मालवण, कणकवली व वेंगुर्ले अशा तीन ठिकाणी तसेच मागासवर्गीय मुलींचे शासकीय वसतिगृह, मालवण, कणकवली, सावंतवाडी, वेंगुर्ले व देवगड अशा पाच ठिकाणी आहेत. या आठ शासकीय वसतिगृहांमध्ये विद्यार्थी, विद्यार्थिनींना २०२५-२६ या शैक्षणिक वर्षासाठी मोफत प्रवेशाची संधी उपलब्ध झाल्याची माहिती समाज कल्याणचे सहाय्यक आयुक्त संतोष चिकणे यांनी दिली. अनुसूचित जाती, विमुक्त जाती, भटक्या जमाती, इतर मागासवर्गीयसह इतर प्रवर्गाच्या व्यावसायिक अभ्यासक्रमासाठी प्रथम वर्षात प्रवेश घेणाऱ्या विद्यार्थ्यांना वसतिगृहामध्ये रिक्त असणाऱ्या जागेवर विनामूल्य प्रवेश ऑनलाईन पद्धतीने देण्यात येणार आहे. पोर्टलवर अर्ज भरण्याची सुविधा उपलब्ध केली आहे. गरजू विद्यार्थ्यांनी आठवी ते दहावी तसेच दहावीनंतरच्या अभ्यासक्रम व बी.ए, बी.कॉम, बी.एस.सी. अशा बारावीनंतरच्या अभ्यासक्रमांमध्ये प्रवेश घेतलेल्या पदविका, पदवी आणि एम.ए., एम.कॉम, एम.एस.सी असे पदवीनंतरचे पदव्युत्तर, पदवी, पदवीका आदी अभ्यासक्रमांसाठी पोर्टलवर ऑनलाईन अर्ज भरावेत, असे आवाहन केले आहे.
........................
‘मॅट्रिकोत्तर शिष्यवृती
योजनेसाठी अर्ज करा’
सिंधुदुर्गनगरी ः शैक्षणिक वर्ष २०२५-२६ करिता भारत सरकार मॅट्रिकोत्तर शिष्यवृती, मॅट्रिकोत्तर शिक्षण फी, परीक्षा फी प्रदाने, राजर्षी छत्रपती शाहू महाराज गुणवत्ता शिष्यवृती व व्यावसायिक पाठ्यक्रमाशी संलग्न वसतिगृहातील विद्यार्थ्यांना निर्वाहभत्ता योजनेचे नवीन अर्ज नोंदणी करणे व नूतनीकरण अर्ज नोंदणी करण्याची सुरुवात १५ जूनपासून महाडिबीटी पोर्टलवरील संकेतस्थळावर उपलब्ध करून देण्यात येणार असल्याची माहिती समाज कल्याणचे सहायक आयुक्त संतोष चिकणे यांनी दिली. जिल्ह्यातील सर्व कनिष्ठ, वरिष्ठ व व्यावसायिक महाविद्यालयांच्या प्राचार्यांनी आपल्या महाविद्यालयात प्रवेशित योजनेस पात्र विद्यार्थ्यांचे ऑनलाईन शिष्यवृत्ती अर्ज वेळापत्रकानुसार १५ जूनपासून महाडिबीटी पोर्टलवर ऑनलाईन सादर करावेत. या योजनेपासून अनुसूचित जाती प्रवर्गातील विद्यार्थी वंचित राहिल्यास यास संबंधित महाविद्यालयातील प्राचार्य जबाबदार राहतील, असे समाजकल्याण कार्यालयाने प्रसिद्धी पत्रकाद्वारे कळविले आहे.
.....................
सुब्रोतो मुखर्जी चषक
फुटबॉल स्पर्धा जुलैत
सिंधुदुर्गनगरी ः क्रीडा व युवक सेवा संचालनालय, महाराष्ट्र राज्य पुणे, जिल्हा क्रीडा परिषद व जिल्हा क्रीडा अधिकारी कार्यालय सिंधुदुर्गअंतर्गत जिल्हास्तर सुब्रोतो मुखर्जी चषक फुटबॉल स्पर्धा जुलैच्या पहिल्या आठवड्यात आयोजित करण्यात येणार आहे. याची सर्व जिल्ह्यातील शाळांनी नोंद घ्यावी तसेच जे संघ या स्पर्धेत सहभागी होणार आहेत, अशा सर्व शाळांनी, संघांनी सहभागापूर्वी संकेतस्थळावर खेळाडू तसेच संघांची नोंदणी करण्याचे आवाहन प्रभारी जिल्हा क्रीडा अधिकारी विजय शिंदे यांनी केले आहे. ही स्पर्धा १५ वर्षांखालील मुले (सब ज्युनिअर) व १७ वर्षांखालील मुले व मुली (ज्युनिअर) या वयोगटात आयोजित करण्यात येणार आहे. स्पर्धेत सहभागी होणाऱ्या खेळाडूंसाठी जन्मतारखेनुसार वयोमर्यादा अशी ः पंधरा वर्षांखालील मुले (सबज्युनिअर) जन्मतारीख १ जानेवारी २०११ रोजी किंवा त्यानंतर जन्मलेला आसावा. सतरा वर्षांखालील मुले व मुली (ज्युनिअर) जन्मतारीख १ जानेवारी २००९ रोजी अथवा त्यानंतर जन्मलेला असावा.
.......................
सिंधुदुर्गनगरीत शुक्रवारी
शिवराज्याभिषेक दिन
सिंधुदुर्गनगरी ः शासनाच्या कौशल्य, रोजगार, उद्योजकता व नाविन्यता विभागांतर्गत ६ जून रोजी पद्मश्री रमाकांत आचरेकर शासकीय औद्योगिक प्रशिक्षण संस्था ओरोस येथे ‘छत्रपती शिवराज्याभिषेक दिन’ साजरा करण्यात येणार आहे. संस्थेतून उत्तीर्ण झालेले तसेच रोजगार व स्वयंरोजगार करणारे या संस्थेचे माजी प्रशिक्षणार्थींनी उपस्थित रहाण्याचे आवाहन प्रशिक्षण संस्थाचे प्राचार्य ए. एस. मोहारे यांनी केले आहे. या कार्यक्रमानिमित्त संस्थेमध्ये निमंत्रित प्रमुख व्याख्यांतामार्फत ‘सामाजिक समरसता’ या विषयावर व्याख्यान आयोजित केले आहे. प्रमुख पाहुणे, व्याख्याते तसेच जिल्ह्यातील लोकप्रतिनिधींना आमंत्रित केले आहे.