ज्योतिरादित्य, लखन यांचा सन्मान
सकाळ वृत्तसेवा
रत्नागिरी, ता. ६ ः जगद्गुरु नरेंद्राचार्य महाराज संस्थान संचलित नाणीज येथील जगदगुरू नरेंद्राचार्यजी महाराज एज्युकेशनल इन्स्टीट्यूट या प्रशालेचा बारावीचा निकाल शंभर टक्के लागला असून विज्ञान शाखेत ज्योतिरादित्य पाटील व कॉमर्स शाखेत लखन बाळकुंडे हे प्रशालेत प्रथम आले. त्यांचा संस्थानतर्फे सन्मान करण्यात आला आहे. यावर्षीपासून प्रशालेमध्ये सीबीएससी बोर्डाचा अभ्यासक्रमही सुरू करण्यात आला असल्याचे इन्स्टिट्यूटतर्फे सांगण्यात आले. जगद्गुरु रामानंदाचार्य नरेंद्राचार्यजी व कानिफनाथ महाराज यांनी सर्व यशस्वी विद्यार्थ्यांचे अभिनंदन केले. तसेच इन्स्टिट्यूटचे चेअरमन अर्जुन फुले, मुख्याध्यापिका अबोली पाटील यांनीही सर्व उत्तीर्ण विद्यार्थ्यांचे अभिनंदन केले आहे. जगद्गुरु नरेंद्राचार्य महाराज संस्थान संचलित या इंग्रजी माध्यमाच्या प्रशालेमध्ये पूर्णपणे मोफत शिक्षण दिले जाते. त्यामुळे नाणीज दशक्रोशीतील अनेक गरजू विद्यार्थ्यांना यामुळे दर्जेदार व पूर्णपणे मोफत शिक्षण घेणे शक्य झाले आहे. येथे उत्तम शैक्षणिक प्रगती बरोबरच विद्यार्थ्यांना विविध कलागुणांना वाव देणारे उपक्रम राबवले जातात. विविध स्पर्धा परीक्षांचे मार्गदर्शन, विविध खेळ, क्रीडा स्पर्धा अशा अनेक उपक्रमातून विद्यार्थ्यांचा सर्वांगीण विकास घडवण्याचा प्रयत्न या प्रशालेमध्ये केला जातो. येथे उत्तम भौतिक सुविधा असलेली इमारत आहे. विद्यार्थ्यांसाठी क्रीडांगण, वाचनालय, प्रयोगशाळा, संगणक कक्ष, अशा अनेक सुविधा येथे पूर्णपणे मोफत उपलब्ध आहेत.