68832

सावंतवाडी पालिकेतर्फे माठेवाड्यात वृक्षारोपण

सकाळ वृत्तसेवा
सावंतवाडी, ता. ७ ः नगरपरिषदेमार्फत जागतिक पर्यावरण दिनानिमित्त व माझी वसुंधरा अभियानांतर्गत ‘एक पेड माँ के नाम’ उपक्रम राबविण्यात आला. एनयूएलएम महिला बचतगट, मुख्याधिकारी अश्विनी पाटील, नगरपरिषद अधिकारी, कर्मचारी यांच्या उपस्थितीत शहरात माठेवाडा मदारी रोड येथील खुल्या जागेमध्ये विविध भारतीय प्रजातींच्या रोपांची लागवड करण्यात आली.
या वृक्षारोपण कार्यक्रमावेळी पर्यावरणाविषयी जनजागृती व प्लास्टिक प्रदूषण निर्मूलन या विषयावर माहिती देण्यात आली. ‘माझी वसुंधरा’ अभियानांतर्गत हरित शपथ देण्यात आली. वृक्षारोपणामध्ये साग व महोगनी या प्रजातींची ५० रोपांची लागवड केली. सावंतवाडी नगरपरिषदेच्या विविध खुल्या जागेत १ हजार झाडे लावून त्यांच्या संवर्धनाचे उद्दिष्ट ठेवले आहे. या वृक्षारोपण कार्यक्रमावेळी शहरातील नागरिक मोठ्या संख्येने उपस्थित होते.