वैद्यकीय महाविद्यालयाचा उद्या
संशोधन विभागातर्फे आढावा

ठाकरे गटाच्या इशाऱ्यानंतर दखल

सकाळ वृत्तसेवा
सिंधुदुर्गनगरी, ता. ७ ः सिंधुदुर्ग जिल्हा शासकीय वैद्यकीय महाविद्यालयातील गैरकारभाराबाबत व रुग्णांच्या गैरसोईबाबत वरिष्ठांनी दखल घ्यावी, अन्यथा आंदोलन छेडण्यात येईल, असा इशारा शिवसेना ठाकरे गटाच्या शिष्टमंडळाने दिल्यानंतर याची दखल घेत मुंबई येथील वैद्यकीय शिक्षण व संशोधन विभागाचे सहसंचालक यांनी सोमवारी (ता. ९) सिंधुदुर्ग वैद्यकीय महाविद्यालयाला भेट देऊन आढावा घेणार आहेत.
सिंधुदुर्ग जिल्हा शासकीय महाविद्यालयामध्ये सध्या रुग्णांची फार मोठी गैरसोय होत आहे. रुग्णांना चांगली सेवा मिळत नाही. जिल्हा रुग्णालय व वैद्यकीय महाविद्यालयामध्ये समन्वय नसल्याने रुग्णांना वैद्यकीय सेवेसाठी अनेकवेळा गोव्याला पाठविले जाते. तसेच वैद्यकीय महाविद्यालयामध्ये मस्टरवर २५० कर्मचारी आणि प्रत्यक्षात १५० कर्मचारी उपस्थित असतात. अशा प्रकारे गैरकारभार सुरू असून या कारभाराबाबत जाब विचारण्यासाठी शिवसेना ठाकरे गटाच्या शिष्टमंडळाने नुकतीच वैद्यकीय महाविद्यालयाचे अधिष्ठाता डॉ. अनंत डवंगे यांची भेट घेतली होती. यावेळी माजी आमदार वैभव नाईक, माजी आमदार परशुराम उपरकर, सतीश सावंत, सुशांत नाईक आदी उपस्थित होते.
महाविद्यालयाच्या कारभाराबाबत वरिष्ठांनी दखल घ्यावी व कारभार सुधारावा तसेच रुग्णांना चांगली सेवा द्यावी, अशी मागणी केली होती. वरिष्ठांनी दखल न घेतल्यास २१ जूनला वैद्यकीय महाविद्यालयांसमोर ठिय्या आंदोलन छेडण्याचा इशारा दिला होता. याची दखल घेत वैद्यकीय शिक्षण व संशोधन विभागाच्या सहसंचालकांनी शासकीय वैद्यकीय महाविद्यालयाला भेटीची वेळ दिली आहे, अशी माहिती अधिष्ठाता डॉ. डवंग यांनी दिली.