देवरूख नगरपंचायतीतर्फे वृक्षलागवड
साडवली, ता. ७ : जागतिक पर्यावरण दिनानिमित्ताने देवरूख नगरपंचायतीतर्फे नगरपंचायत कार्यालयाच्या मोकळ्या जागेत वृक्षारोपण मोहिमेचा प्रारंभ नगरपंचायत घनकचरा व्यवस्थापन प्रकल्प परिसर येथे कार्यालय अधीक्षक अभिजित राणे यांच्या हस्ते वृक्षारोपण करून करण्यात आला.
दरवर्षी नगरपंचायतीच्या माध्यमातून जागतिक पर्यावरणदिनाचे औचित्य साधून झाडे लावली जातात. यावर्षी अधिकाधिक झाडे लावून त्यांचे संवर्धन करण्याचा संकल्प केला असून, तशा सूचना उपस्थित अधिकारी व कर्मचारी यांना दिल्या आहेत.
यानुसार जागतिक पर्यावरण दिनानिमित्ताने नगरपंचायतीतर्फे नगरपंचायत घनकचरा व्यवस्थापन प्रकल्प परिसराच्या मोकळ्या जागेत वृक्षारोपण व संवर्धनमोहिमेचा प्रारंभ करण्यात आला व स्वच्छ भारत हरित भारत हरित प्रतिज्ञा घेण्यात आली. बांबू व शेवगा या रोपांची लागवड करण्यात आली. देवरूख नगरपंचायतीतर्फे शहरातील बचतगटांना वृक्षलागवडीकरिता रोपे उपलब्ध करून देण्यात येणार आहेत. या वेळी स्वच्छता निरीक्षक आरिफ शेख, सर्व अधिकारी व कार्यालयीन कर्मचारी तसेच स्वच्छता कर्मचारी आदी उपस्थित होते.