69684

पारंपरिक वटपौर्णिमा सण
देवगड तालुक्यात उत्साहात

सकाळ वृत्तसेवा
देवगड, ता. १० ः तालुक्यात ठिकठिकाणी आज पारंपरिक पध्दतीने वटपौर्णिमा सण साजरा करण्यात आला. सुहासिनी, नवविवाहिता यांनी वटवृक्षाला फेऱ्या मारून सणाचा आनंद घेतला. पाऊस नसल्याने महिलांच्या दृष्टीने सोयीचे झाले होते. सुहासिनी महिला घरोघरी वाण देण्यासाठी जाताना दिसत होत्या. दुपारपर्यंत सर्वत्र उत्साही वातावरण होते. सुवासिनी महिलांच्या दृष्टीने महत्त्वाच्या मानल्या जाणाऱ्या वटपौर्णिमा सणाच्या निमित्ताने येथील बाजारपेठेत आज सकाळीही उलाढाल झाली. वटपौर्णिमा हा कोकणातील महिलांचा पारंपरिक सण. या दिवशी सुवासिनी वटवृक्षाला फेऱ्या मारून पारंपरिक पद्धतीने त्याची पूजा करतात. यासाठी आज सकाळपासूनच महिलांची धावपळ दिसत होती. बाजारात आंबा, फणस, अननस, केळी तसेच अन्य फळांसह फुले खरेदीसाठी सकाळी गर्दी झाली होती. पारंपरिक वस्त्रे परिधान करून महिला नियोजित ठिकाणी वटवृक्षाची पूजा करण्यासाठी येत होत्या. यामध्ये नववधूंपासून वृध्दांपर्यंत सर्वांचाच सहभाग होता. दिवसभर पाऊस नसल्याने वटपौर्णिमा सणाचा आनंद घेता आला. सणाच्या निमित्ताने माहेरवाशिणीही आल्या होत्या.