swt113.jpg
69850
कोळोशीः वटपौर्णिमेनिमित्त वटवृक्षाची लागवड करताना शिवप्रतिष्ठानच्या महिला व शिवप्रेमी.

कोळोशीत वटपौर्णिमेनिमित्त
वटवृक्षाच्या रोपांची लागवड
सकाळ वृत्तसेवा
नांदगाव, ता. ११ः शिवप्रतिष्ठान कोळोशीच्या रणरागिणींनी यावर्षी वटपौर्णिमेला वटवृक्षाची फांदी न तोडता वडाच्या झाडाचे रोपटे लावून पूजा करत फेरे घेतले. या वटपौर्णिमेला ‘झाडे लावा, झाडे जगवा’ असा संदेशही या सुवासिनींनी दिला.
शिवप्रतिष्ठानच्या रणरागिणींनी वटपौर्णिमेच्या औचित्याने आगळावेगळा उपक्रम हाती घेतला. दरवर्षी वटपौर्णिमेच्या दिवशी परिसरातील अनेक झाडांच्या फांद्या तोडल्या जातात. त्या फांद्या घरी आणून त्याची पूजा करतात; मात्र असे न करता वटवृक्षाच्या रोपट्याची लागवड करून त्याची पूजा करूया, असा संकल्प या महिलांनी केला. त्यांच्या या उपक्रमाचे परिसरातून कौतुक केले जात आहे. यासाठी शिवप्रतिष्ठान कोळोशीचे पदाधिकारी दत्ताराम अमृते, विकास इंदप, राजा इंदप, जय इंदप, विजय गुरव, भरत मेस्त्री, श्री. नांदगावकर, प्रकाश इंदप यांनी सहकार्य केले. सानिका इंदप, रेणुका गुरव, अनिता शेलार, किशोरी गुरव, गीता सावंत, मानसी गुरव, शारदा इंदप आदींनी या उपक्रमात सहभाग घेतला. या रणरागिणींना चारुहास इंदप यांनी वटवृक्ष रोपाचे कलम भेट दिले.