swt1114.jpg
69900
भरड ः श्री शिवाजी वाचन मंदिर येथे आयोजित व्याख्यानमालेत शिक्षक सुधीर गोसावी यांनी मार्गदर्शन केले.

इतिहासातून पराक्रमाचे धडे घ्या
सुधीर गोसावी ः भरड वाचन मंदिरात व्याख्यानमाला
सकाळ वृत्तसेवा
मालवण, ता. ११ : इतिहास अभ्यासताना आपल्याला त्यातून काय शिकवण मिळते ते पाहायला हवे. सद्यस्थितीला सामोरे जायला तसेच आजच्या समाजात जागृत राहायला आपल्याला इतिहास शिकवतो, असे प्रतिपादन शिक्षक सुधीर गोसावी यांनी येथे व्यक्त केले.
शहरातील भरड येथील श्री शिवाजी वाचन मंदिर येथे छत्रपती शिवरायांना पुष्पहार अर्पण करून शिवराज्याभिषेक दिन साजरा करण्यात आला. यावेळी श्री. गोसावी यांनी शिवाजी महाराजांना जनतेचा राजा का म्हणतात? स्वराज्याची स्थापना का करण्यात आली? याचा इतिहास सविस्तर सांगितला. राज्याभिषेक सोहळ्यापूर्वी करायचे विधी व संस्कार कसे झाले, याचे वर्णन केले. छत्रपती शिवाजी महाराजांच्या युद्धातील गनिमी कावा व सरसेनापती हंबीररावांनी अवघ्या दीड हजार मावळ्यांच्या फौजेनिशी पठाणांच्या अफाट फौजांना कशी धूळ चारली, याचे आवेशपूर्ण वर्णन उपस्थितांच्या अंगावर रोमांच उभे करणारे होते. महाराजांकडे सैन्यबळ, दारुगोळा कमी असला तरी ते युक्तीने शत्रूशी कसे लढले, याचे वर्णन खुलवून सांगितले. महाराजांनी युद्ध करताना कधी मुहूर्त पाहिले नाही. त्यांनी अमावस्येच्या रात्री शत्रूवर हल्ले कसे केले? सुरतेची लूट का केली? याचेही विश्लेषण केले. युद्धाचा प्रसंग तर अगदी जिवंत उभा केला.
इतिहास अनुभवायचा असेल तर गडकिल्ले अभ्यासा. नुसते गडकिल्ले फिरायला जाऊ नका, असा संदेश त्यांनी दिला. यावेळी संस्थेतर्फे श्रीधर काळे यांनी भेट स्वरुप पुस्तक देऊन श्री. गोसावी यांचा सत्कार केला. डॉ. सुभाष दिघे, रुजारिओ पिंटो, वैदेही जुवाटकर, रत्नाकर कोळंबकर तसेच वाचक व कर्मचारी वर्ग उपस्थित होते.