हैद्राबाद, बंगळूर विमान फेऱ्या
सिंधुदुर्ग विमानतळावरून सुरू
सकाळ वृत्तसेवा
म्हापण, ता. १२ः चिपी येथील सिंधुदुर्ग विमानतळावरून अखेर काल (ता.११) पासून दोन नवीन विमान फेऱ्या सुरू झाल्या आहेत. फ्लाय ९१ कंपनीची सिंधुदुर्ग हैद्राबाद आणि बंगळूर विमान फेरी सेवा कालपासून सुरू झाली. कंपनीतर्फे प्रवाशांना विमानसेवेची बुकिंग सुविधा उपलब्ध करून दिली होती. लवकरच या दोन सेवा नियमित होतील. त्यामुळे प्रवाशांना याचा फायदा होणार आहे.
सिंधुदुर्ग विमानतळावर काल सकाळी ८.३० वाजता सिंधुदुर्ग ते हैद्राबाद विमान फेरीने उड्डाण केले. त्यावेळी ३० प्रवाशी यांनी प्रवास केला. त्यानंतर दुपारी १ वाजता सिंधुदुर्ग ते बंगळूरसाठी विमान फेरीने उडान केले. यावेळी ३५ प्रवासी होते. कंपनीच्या सिंधुदुर्ग पुणे विमान फेरी आठवड्यातून पाच दिवस सुरू आहे. त्यातच कंपनीतर्फे आता हैद्राबाद आणि बंगळूर सेवा सुरू केली आहे. त्यामुळे प्रवाशांना या दोन विमान फेरी चा लाभ घेता येणार आहे.
सिंधुदुर्ग विमानतळावर विमानसेवा सिग्नल व्यवस्था आता व्यवस्थित सक्षम केली आहे. त्यामुळे आता वातावरणातील बदलामुळे निर्माण होणाऱ्या अडचणी येत नाहीत. परिणामी प्रवाशांना त्रास होत नाही. लवकरच सिंधुदुर्ग मुंबई विमान सेवा सुरू झाली तर प्रवाशी वर्गाला मोठा फायदा होऊ शकतो. फ्लाय ९१ च्या अधिकृत संकेतस्थळावर हैद्राबाद आणि बंगळूर सेवा बुकिंग सुरू झाले आहे.