rat१३p१८.jpg-
२५N७०३६८
जलजीवन मिशन योजनेअंतर्गत स्रोत बळकटीकरण आणि शाश्वतीकरण या दोनदिवसीय प्रशिक्षणादरम्यान खेड येथे उपस्थित मान्यवर व प्रशिक्षणार्थी.

भूजल स्रोतांचे बळकटीकरण आवश्यक
गणेश मंडलीक ः दोन दिवसाचा प्रशिक्षण कार्यक्रम
सकाळ वृत्तसेवा
खेड, ता. १३ : भविष्यातील गरजांचा विचार करता शाश्वत पाणीसाठ्यांसाठी भूजल स्रोतांचे बळकटीकरण अत्यंत आवश्यक आहे, असे मत खेड पंचायत समितीचे गटविकास अधिकारी गणेश मंडलीक यांनी व्यक्त केले.
जलजीवन मिशन योजनेअंतर्गत स्रोत बळकटीकरण आणि शाश्वतीकरण या दोनदिवसीय प्रशिक्षणाच्या खेड येथील सहाव्या व सातव्या तुकड्यांच्या प्रशिक्षण प्रारंभप्रसंगी ते बोलत होते.
जिल्हा परिषद पाणीपुरवठा विभाग आणि जेपीएस फाउंडेशन लखनऊ यांच्या संयुक्त विद्यमाने भरणेनाका येथील काळकाई सभागृह आणि गणेश मंगल कार्यालय येथे ९ ते १२ जून या कालावधीत प्रशिक्षण आयोजित करण्यात आले आहे. या प्रशिक्षणाचा प्रारंभ काल (ता. १२) गटविकास अधिकारी यांच्या हस्ते पार पडला. याच वेळी पाण्याच्या तपासणीसाठी राज्यशासनातर्फे ग्रामपंचायतींना देण्यात येणाऱ्या क्षेत्रीय तपासणीसंचांच्या (फील्ड टेस्टिंग कीट) वितरणाचादेखील प्रातिनिधिक स्वरूपात प्रारंभ करण्यात आला. तसेच ‘हर घर जल’ आणि ‘माझी वसुंधरा’ व स्वच्छ भारत मिशन अंतर्गत मॉडेल व्हिलेजअंतर्गत घोषित ग्रामपंचायतींच्या पदाधिकाऱ्यांचा प्रमाणपत्र आणि वडाच्या झाडाची रोपे देऊन गौरव करण्यात आला.
या वेळी व्यासपीठावर गटविकास अधिकारी, विस्तार अधिकारी ग्रामपंचायत मुख्य संसाधन केंद्रांचे प्रतिनिधी मंगेश नेवगे, अर्चना पाटील, सत्यवान भरते, शुभांगी देसाई आदी उपस्थित होते. या प्रशिक्षणासाठी संबंधित ग्रामपंचायतीचे सरपंच, उपसरपंच, ग्राम पाणीपुरवठा व स्वच्छता समितीचे सदस्य, अंगणवाडी सेविका, जलसुरक्षक मोठ्या संख्येने उपस्थित होते. प्रशिक्षण समन्वयक मंगेश नेवगे यांनी प्रास्ताविक केले आणि आभार प्रदर्शन केले.