71287

‘त्या’ पडझडीच्या घटनांमुळे
जिल्ह्याची देशात बदनामी

उपरकर ः मर्जीतल्याच ठेकेदारांना काम

सकाळ वृत्तसेवा
कणकवली, ता. १७ : मालवण राजकोट येथील शिवरायांच्या पुतळ्याच्या परिसरातील काम निकृष्ट झाले आहे. त्या ठिकाणी होणाऱ्या पडझडीच्या घटनांमुळे मालवण व सिंधुदुर्गवासीयांची देशात बदनामी होत आहे. याला पालकमंत्री व सार्वजनिक बांधकाम विभागाचे अधिकारी व कर्मचारी जबाबदार आहेत, असा आरोप ठाकरे शिवसेनेचे नेते तथा माजी आमदार परशुराम उपरकर यांनी केला.
येथील संपर्क कार्यालयात आयोजित पत्रकार परिषदेत श्री. उपरकर म्हणाले, ‘‘तत्कालीन कार्यकारी अभियंत्यांनी आपल्या कार्यकाळात मर्जीतल्या ठेकेदाराला अनेक कामे दिली. त्या मोबदल्यात त्यांच्याकडून आर्थिक मलिदा घेण्याचे काम केले. त्या ठेकेदाराने केलेली कामे निकृष्ट दर्जाची झाली आहेत. कणकवली रेल्वे स्थानक परिसरातील सिलिंगचा भाग कोसळला, हे त्याचे उदहारण आहे. कार्यकारी अभियंत्यांनी पदाचा गैरवापर करून स्वत:च्या जॉबकार्डवर तरुण ठेकेदारांना कामे दिली. ती कामे पूर्ण झाली आहेत; मात्र ठेकेदारांना अद्यापही कामाचे पैसे मिळाले नाहीत. त्यामुळे ते ठेकेदार देशोधडीला लागले असून मोठ्या अडचणीत सापडले आहेत.’’
ते पुढे म्हणाले, ‘‘त्या अधिकाऱ्याच्या कार्यकाळात काही कोटींची कामे झाली. या कामांमध्ये भ्रष्टाचार झाला आहे. निकृष्ट काम करणाऱ्या अधिकारी व ठेकेदारांना काळ्या यादीत टाकावे, असे आदेश पालकमंत्री बैठकांमध्ये देत आहेत; मात्र आजपर्यंत कोणत्याही अधिकारी व ठेकेदाराला काळ्या यादीत टाकलेले नाही, यामागे मोठे गूढ आहे. मालवणच्या ऐतिहासिक राजकोट किल्ल्यावर नव्याने बांधलेल्या छत्रपती शिवाजी महाराज यांच्या भव्य पुतळ्याच्या चबुतऱ्यानजीक केलेली चिऱ्याची फरसबंदी खचली आहे. त्यामुळे पुतळ्याच्या परिसरात केलेले काम निकृष्ट असल्याचे उघड झाले आहे. मुळात शिवरायांचा पहिला पुतळा पडल्यानंतर नव्याने पुतळा उभारताना राजकोट येथील भौगोलिक स्थितीचा अभ्यास संबंधित विभागांनी करणे अपेक्षित होते. मात्र, तो न केल्याने अशा घटना घडत आहेत. याला सार्वजनिक बांधकाम विभागातील अधिकाऱ्यांच्या मर्जीतला ‘तो’ ठेकेदार जबाबदार आहे.’’