71491

सुतार समाजाच्या विकासासाठी कटिबद्ध

विद्यानंद मानकर ः कुंभारमाठ येथे गुणगौरव सोहळा

सकाळ वृत्तसेवा
मालवण, ता. १८ : सुतार समाजाच्या सर्वांगीण विकासासाठी महाराष्ट्र राज्य इतर मागासवर्गीय वित्त आणि विकास महामंडळ अंतर्गत उपकंपनी म्हणून संत भोजलिंग काका सुतार समाज आर्थिक विकास महामंडळाची स्थापना करण्यात आली. हे समन्वय समितीच्या व सकल सुतार समाजाच्या लढ्याला मिळालेले यश आहे. सध्या या महामंडळासाठी ५० कोटींचा वार्षिक निधी उपलब्ध झाला असून तो संपूर्ण महाराष्ट्रात पूर्णपणे खर्ची व्हावा, यासाठी सुशिक्षित आणि तरुण समाजबांधवांनी ही योजना लोकांपर्यंत पोहोचवून त्यांना त्याचा लाभ मिळवून द्या, असे आवाहन महाराष्ट्र राज्य विश्वकर्मीय सुतार समाज समन्वय समितीचे मुख्य समन्वयक विद्यानंद मानकर यांनी कुंभारमाठ येथे केले.
महाराष्ट्र राज्य विश्वकर्मा समन्वय समितीतर्फे तालुक्यातील सुतार समाजातील गुणवंत विद्यार्थ्यांचा गुणगौरव समारंभ आणि समाजबांधव मेळावा कुंभारमाठ जानकी मंगल कार्यालय येथे नुकताच झाला. या कार्यक्रमासाठी अध्यक्ष म्हणून महाराष्ट्र समितीचे मुख्य समन्वयक मानकर तसेच विश्वकर्मा क्रांती दल महाराष्ट्र राज्य अध्यक्ष बाळासाहेब पांचाळ (नांदेड), ज्येष्ठ मार्गदर्शक शिवाजीराव सुतार (सातारा) आणि पुण्यातील सुतार समाज संघटनांचे पदाधिकारी उपस्थित होते.
तालुक्यातील सुतार समाज गुणवंत विद्यार्थ्यांचा गुणगौरव करण्यात आला. आर्थिक विकास महामंडळाची माहिती श्री. मानकर यांनी दिली. विश्वकर्मा क्रांती दलाचे अध्यक्ष बाळासाहेब पांचाळ यांनी समाजावर होणारे अन्याय परखडपणे मांडताना वेळ पडल्यास जशास तसे उत्तर द्या, असे आवाहन केले. यावेळी जगप्रसिद्ध मूर्तिकार बाळकृष्ण उर्फ दाजी मेस्त्री यांचा ‘समाजरत्न’ पुरस्कार देऊन गौरव झाला. महाराष्ट्र राज्य विश्वकर्मा समन्वय समितीचे राज्य समन्वयक आनंद मेस्त्री, जिल्हाध्यक्ष शरद मेस्त्री, राजू मेस्त्री, प्रकाश मेस्त्री, बाबाजी मेस्त्री, विलास मेस्त्री, अरुण मेस्त्री, अमिदी मेस्त्री, आरती मेस्त्री, अस्मिता मेस्त्री, राजश्री मेस्त्री, शंकर मेस्त्री, संतोष मेस्त्री, सचिन मेस्त्री, सुहानी मेस्त्री, कृष्णा मेस्त्री, महेश मेस्त्री, आशिष अणाववकर, नंदू मेस्त्री, संजय मेस्त्री, दाजी मेस्त्री, भास्कर मेस्त्री उपस्थित होते.