चिपळुणात प्लास्टिकमुक्त शहर अभियान
अभिनेते ओंकार भोजनेंची आज उपस्थिती; व्यापाऱ्यांमध्ये जनजागृती
सकाळ वृत्तसेवा
चिपळूण, ता. १९ : चिपळूण शहर प्लास्टिकमुक्त करण्यासाठी प्रांताधिकारी कार्यालय आणि चिपळूण यांच्या संयुक्त विद्यमाने प्लास्टिकमुक्त चिपळूण शहर अभियान २०२५ उद्यापासून (ता. २०) राबवण्यात येणार आहे. या अभियानात चिपळूण पालिकेच्या स्वच्छता अभियानाचे ब्रँड अँबेसिडर अभिनेते ओंकार भोजने उपस्थित राहणार आहेत.
प्लास्टिकमुक्त चिपळूण शहर अभियानाच्या निमित्ताने शहरात विविध उपक्रमांचे आयोजन करण्यात आले आहे. सकाळी आठ वाजल्यापासून दहा वाजेपर्यंत शहरातील अकरा ठिकाणी एकावेळी प्लास्टिक कचरा संकलन मोहीम राबवण्यात येणार आहे. त्यानंतर सकाळी दहा वाजता गांधारेश्वरतिठा परिसरात वृक्षारोपण करण्यात येईल. त्यानंतर सकाळी साडेदहा वाजता अभिनेते भोजने स्वच्छता कर्मचाऱ्यांसोबत घंटागाडीवरून प्रत्यक्ष कचरा संकलनात सहभागी होणार आहेत. सकाळी अकरा वाजता चिंचनाका ते नाथ पै चौक या मार्गावर एकल वापराच्या प्लॅस्टिकवर बंदीबाबत व्यापाऱ्यांमध्ये जनजागृती करण्यासाठी माहिती पत्रकांचे वाटप करण्यात येणार आहे. त्यानंतर साडेअकरा वाजता चिंचनाका व जुन्या एसटी स्टँड बाजारपेठ येथे कापडी पिशव्या वेंडिंग मशिनचा अनावरण सोहळा होणार आहे. दुपारी चिपळूण नगर पालिका हद्दीत ‘प्लास्टिक निषिद्ध क्षेत्र’ फलकाचे अनावरण करण्यात येईल. नागरिकांनी या उपक्रमांमध्ये मोठ्या संख्येने सहभागी व्हावे, असे आवाहन प्रांताधिकारी आकाश लिगाडे व मुख्याधिकारी विशाल भोसले यांनी केले आहे.