swt244.jpg
72722
कट्टा : सेवांगण येथे मोफत शिष्यवृती वर्गाचा मान्यवरांच्या उपस्थितीत प्रारंभ करण्यात आला.

सेवांगणचे शैक्षणिक उपक्रम प्रेरणादायी
दीपक भोगटेः कट्टा येथे मोफत शिष्यवृती वर्गाचा प्रारंभ
सकाळ वृत्तसेवा
ओरोस, ता. २४ः बॅ. नाथ पै सेवांगण कट्टाचे मोफत शिष्यवृत्ती वर्ग सातत्याने २५ वर्षे सुरू आहे. यासाठी परिसरातील ३० पेक्षा जास्त शिक्षकांनी विनामूल्य मार्गदर्शन केले आहे. या वर्गाचा २००० पेक्षा जास्त विद्यार्थ्यांनी लाभ घेतला असून आजपर्यंत १६७ विद्यार्थी गुणवत्ता यादीत झळकले आहेत. या सर्व विद्यार्थ्यांना शिष्यवृत्ती मिळाली आहे. यावर्षी २५ विद्यार्थी गुणवता यादीत येण्यासाठी सर्व पालक व विद्यार्थी यांनी कठोर परिश्रम करावेत व नियमित येऊन या वर्गाचा लाभ घ्यावा, असे आवाहन सेवांगणचे विश्वस्त दीपक भोगटे यांनी केले.
बॅ. नाथ पै सेवांगण कट्टा येथे पाचवी शिष्यवृती व आठवी एनएमएमएस या मोफत शिष्यवृती वर्गाचा प्रारंभ करण्यात आला. यावेळी भोगटे बोलत होते. या कार्यक्रमास कट्टा शाखेचे अध्यक्ष बापू तळावडेकर, शिक्षक बाळकृष्ण नांदोससकर, संपदा भाट, मनोज काळसेकर, विद्याधर चिंदरकर, बाळकृष्ण गोंधळी उपस्थित होते. या शिष्यवृत्ती वर्गाचे हे २५ वे वर्ष आहे.
या शिष्यवृत्ती वर्गाला अनेक वर्षे मार्गदर्शन करणारे शिक्षक नांदोसकर यांनी मुलांना व पालकांना मौलिक मार्गदर्शन केले. स्पर्धा परीक्षांची ही प्राथमिक परीक्षा असून पुढील उज्ज्वल यशासाठी ही परीक्षा महत्त्वाची आहे. पालकांनी मुलांना अभ्यासात मदत करावी व त्यांची गुणवत्ता वाढवावी, असे आवाहन त्यांनी केले. शिक्षिका संपदा भाट यांनी, सेवांगण कट्टा शाखा सातत्याने २५ वर्षे हा उपक्रम चालवत आहेत, याबद्दल कौतुक केले. कट्टा दशक्रोशीत अनेक उपकमांद्वारे सेवांगणने शैक्षणिक गुणवत्ता वाढविली असून यासाठी आपले नेहमीच सहकार्य राहील, असे सांगितले. या शिष्यवृत्ती वर्गाचे प्रमुख मार्गदर्शक मनोज काळसेकर यांनी संपूर्ण वर्गाची रुपरेषा पालकांना समजावून सांगितली. वर्षभराचे नियोजन विद्यार्थ्यांना दिले. सर्वांनी नियमित वर्गात येणे आवश्यक असल्याचे सांगितले. सर्व मुलांना प्रा. मधू दंडवते, शाहू महाराज व अंधश्रध्देवरील पुस्तके वाचनासाठी देण्यात आली.