74022

खासगी वसतिगृह संघटनेच्या
कार्याध्यक्षपदी दयानंद कुबल

बांदा, ता. २७ ः महाराष्ट्रातील खासगी वसतिगृह संघटनेच्या कार्याध्यक्षपदी दयानंद कुबल (मुंबई) यांची, अध्यक्षपदी महेश निंबाळकर (पुणे) तर सचिवपदी महेश यादव यांची नियुक्ती झाली.
बालकांच्या वसतिगृहात संस्थांचा स्तर वाढवण्यासाठी प्रयत्न करणार असल्याचे यावेळी जाहीर केले. महाराष्ट्रातील विविध जिल्ह्यांमध्ये आर्थिकदृष्ट्या दुर्बल आणि गरजू मुलांसाठी खासगी सामाजिक संस्थांच्या माध्यमातून वसतिगृहे चालवली जातात. मात्र, अलीकडील काही अपवादात्मक घटनांमुळे संपूर्ण वसतिगृह क्षेत्रच संशयाच्या छायेत सापडले आहे. परिणामी प्रामाणिकपणे कार्यरत संस्थांनाही नोटिसा, चौकशी आणि कारवाईचा सामना करावा लागत आहे. या आव्हानांना सामोरे जाण्यासाठी राज्यातील सामाजिक संस्थांनी एकत्र येऊन खासगी वसतिगृह संघटना स्थापन केली आहे. या संघटनेच्या उपाध्यक्षपदी ॲड. सुजाता अंगडी, सचिवपदी महेश यादव, सहसचिव अक्षदा भोसले, कोषाध्यक्ष विश्वास लोंढे, सदस्यपदी तेजस कोठावळे, ॲड. राजीव करडे, प्रसाद मोहिते, दत्ता इंगळे, शरद आढाव, मधुकर सोनवणे, सुधीर भोसले यांची निवड केली. ही संघटना शासकीय निकषांचे पालन करणाऱ्या संस्थांना संरक्षण देण्यासाठी, पारदर्शक कार्यपद्धती राबवण्यासाठी आणि बालकांच्या हक्कांचे रक्षण करण्यासाठी कार्यरत राहणार असल्याचे कुबल यांनी सांगितले.