- rat२p१०.jpg-
२५N७४६८६
जळगाव ः राज्यस्तरीय प्रथम क्रमांकाचे पारितोषिक स्वीकारताना प्राचार्य राजेंद्र वारे, पर्यवेक्षक उद्धव तोडकर व शिक्षक.
---
निकम विद्यालयाला लाखाचे पहिले पारितोषिक
राज्यस्तरीय स्वच्छ शाळा स्पर्धा; सलग तिसऱ्या वर्षी यश
सकाळ वृत्तसेवा
सावर्डे, ता. २ ः जळगाव येथील गांधी रिसर्च फाउंडेशनतर्फे २०२४-२५ शैक्षणिक वर्षात राबवलेल्या गांधीतीर्थ स्वच्छ शाळा या राज्यस्तरीय स्पर्धेत सावर्डे येथील सह्याद्री शिक्षणसंस्थेच्या गोविंदराव निकम माध्यमिक व उच्च माध्यमिक विद्यालयाने सलग तिसऱ्या वर्षी राज्यस्तरावरील एक लाख रुपयांचे पहिले पारितोषिक पटकावले.
महात्मा गांधीजी यांचे स्वच्छतेविषयीचे विचार समाजात रुजले जावेत यासाठी राज्यस्तरीय स्पर्धेचे आयोजन करण्यात आले होते. या स्पर्धेचे पारितोषिक वितरण नुकतेच जळगाव येथील कस्तुरबा गांधी सभागृहात झाले. या प्रसंगी पुणे येथील सागरमित्र अभियानाची सहसंस्थापक विनोद बोधनकर, शिक्षण विभागाच्या राज्य सल्लागार परिषदेचे सदस्य अनिल बोरनारे, जळगाव जिल्हा परिषद मुख्य कार्यकारी अधिकारी मिनल करनवाल, अशोक जैन, अंबिका जैन, गिरीश कुलकर्णी आदी उपस्थित होते.
राज्यातून चौदाशे विद्यालयांनी या स्पर्धेत सहभाग नोंदवला होता. सावर्डे या विद्यालयाने मुख्यमंत्री माझी शाळा सुंदर शाळा टप्पा क्र. १ मध्ये विभागात दुसरा क्रमांक प्राप्त केला होता तर टप्पा क्र. २ मध्ये जिल्ह्यात प्रथम क्रमांक मिळवला आहे तसेच आता राज्यस्तरीय स्पर्धेत सलग तिसऱ्या वर्षी एक लाखाचे पारितोषिक मिळवले. विद्यालयाने सातत्यपूर्ण कामगिरी करून या स्पर्धेत प्रथम क्रमांकाचे पारितोषिक प्राप्त केल्याबद्दल विद्यालयाचे प्राचार्य राजेंद्र वारे, उपप्राचार्य विजय चव्हाण, पर्यवेक्षक उद्धव तोडकर, गांधीतीर्थ स्वच्छ शाळा समन्वयक जयंत काकडे, संस्थेचे कार्याध्यक्ष व आमदार शेखर निकम, ज्येष्ठ संचालक व शालेय समितीचे अध्यक्ष शांताराम खानविलकर, सचिव महेश महाडीक आदींनी विद्यालयाचे कौतुक केले आहे.

स्वच्छतेविषयक राबवलेले उपक्रम
सावर्डे विद्यालयाने प्लास्टिकमुक्ती शाळा, स्वच्छता, परिसर स्वच्छता, ग्रामस्वच्छता, वैकुंठभूमी स्वच्छता, पाणवठा स्वच्छता, प्लास्टिकचा पुनर्वापर अथवा त्याची योग्य विल्हेवाट या उपक्रमावर वर्षभर अतिशय परिणामकारक काम करून समाजजागृती करण्यासाठी विशेष भर दिला आहे.