चिपळुणात आज खैराच्या रोपांचे वाटप
गिरिजा देसाई ः पालकमंत्री डॉ. उदय सामंतांची उपस्थिती
सकाळ वृत्तसेवा
चिपळूण, ता. ४ ः रत्नागिरी जिल्ह्यातील शेतकऱ्यांना खैर प्रजातीच्या रोपांचे मोफत वाटप करण्यात येणार असून, या उपक्रमाचे उद्‍घाटन उद्या (ता. ५) सकाळी १० ते ११.३० या वेळेत चिपळूण येथील इंदिरा गांधी सांस्कृतिक सभागृहात होणाऱ्या कार्यक्रमात पालकमंत्री डॉ. उदय सामंत यांच्या हस्ते केले जाणार आहे. या कार्यक्रमाचे आयोजन वनविभाग आणि सामाजिक वनीकरण विभाग यांच्या संयुक्त विद्यमाने करण्यात आले आहे, अशी माहिती विभागीय वनाधिकारी रणजीत गायकवाड आणि विभागीय वनाधिकारी गिरिजा देसाई यांनी दिली.
चिपळूण येथे होणाऱ्या या कार्यक्रमात वन वणवा प्रतिबंधात्मक उपाययोजना या विषयावरही जनजागृतीपर सत्र घेतले जाणार असून, वनसंवर्धनाच्यादृष्टीने नागरिकांचा व शेतकऱ्यांचा सहभाग वाढावा, हा या उपक्रमामागील उद्देश आहे. या कार्यक्रमाला गृहराज्यमंत्री योगेश कदम, खासदार नारायण राणे, खासदार सुनील तटकरे, विधान परिषद सदस्य आमदार निरंजन डावखरे, आमदार प्रसाद लाड, आमदार ज्ञानेश्वर म्हात्रे, आमदार भास्कर जाधव, आमदार शेखर निकम आणि आमदार किरण सामंत, जिल्हाधिकारी एम. देवेंदर सिंह, पोलिस अधीक्षक नितीन बगाटे आणि मुख्य कार्यकारी अधिकारी वैदेही रानडे उपस्थित राहणार आहेत.
---