75294

घराचे पत्रे तुटल्यामुळे
टेंबवली येथे नुकसान

सकाळ वृत्तसेवा
देवगड, ता. ४ ः तालुक्याच्या किनारी भागात पावसाने चांगलाच जोर धरला आहे. वादळी वाऱ्यासह झालेल्या मुसळधार पावसामुळे तालुक्यातील टेंबवली येथील एका घराच्या छप्पराचे पत्रे उडून सुमारे ४५ हजारांचे नुकसान झाले. नुकसानीची महसूल यंत्रणेने माहिती घेतली. दरम्यान, गेल्या चोवीस तासांत आज सकाळपर्यंत येथे ३० मिलिमीटर (एकूण १४८३ मिलीमीटर) इतकी पावसाची नोंद झाली.
गेल्या दोन दिवसांपासून तालुक्याच्या किनारी भागांत पावसाने चांगलाच जोर धरला आहे. त्यामुळे ओढ्यांना पूरसदृशस्थिती निर्माण झाली. किनारी भागात वादळी वाऱ्यासह पावसाच्या जोरदार सरी बरसत आहेत. सततचा पाऊस आणि वादळी वाऱ्यामुळे आज सकाळच्या सुमारास तालुक्यातील टेंबवली येथील एका घराच्या छपराचे पत्रे उडून गेले. महसूल यंत्रणेने नुकसानीचा पंचनामा केला. सायंकाळीही येथे जोराच्या सरी बरसल्या. आकाश काळवंडून येऊन सरी कोसळत होत्या. सततच्या पावसामुळे वातावरणात गारठा पसरला होता. पावसामुळे भात लावणीला पाणी मिळाल्याने शेतकरी समाधानी आहे. आतापर्यंत तालुक्यात १४८३ मिलिमीटर इतका पाऊस झाला आहे. दरम्यान, रविवारी (ता.६) आषाढी एकादशी असल्याने पावसाचा जोर असाच कायम राहील, अशी शक्यता वर्तवण्यात येत होती.