75472

बॅ. नाथ पै सेंट्रल स्कूलमध्ये
दुमदुमला विठूनामाचा जयघोष

सकाळ वृत्तसेवा
कुडाळ, ता. ५ ः पंढरपूर निवासी विठूमाऊलीच्या आषाढी वारीचे औचित्य साधून येथील बॅ. नाथ पै सेंट्रल स्कूलमध्ये उत्साही व भक्तिमय वातावरणात वारकरी दिंडी पार पडली. विद्यार्थ्यांचा उत्साह सर्वांनीच कॅमेऱ्यात कैद केला.
बॅ. नाथ पै शिक्षण संस्था नेहमीच सांस्कृतिक कार्यक्रमांना अग्रक्रम देत असते. आषाढी वारीचे निमित्त साधून शुक्रवारी (ता. ४) नर्सरी ते पाचवीपर्यंतच्या विद्यार्थ्यांच्या वारीचे आयोजन करण्यात आले. वारकरी स्त्री-पुरुषांच्या वेशात विद्यार्थी सहभागी झाले. टाळ-मृदंगाच्या साथीने ‘या विठूचा गजर हरिनामाचा झेंडा रोविला’ असा विठूनामाचा गजर करीत प्रशालेपासून ते ब्राह्मणदेव मंदिरापर्यंत पायी वारी काढली. वारी ब्रह्मदेव मंदिरात विसावल्यावर वारकरी भजनाचे शिक्षकांकडून सादरीकरण करण्यात आले. त्याला सर्व वारकऱ्यांनी भक्तिभावाने साथ दिली. सर्व वारकऱ्यांना महाप्रसादाचे वाटप केले. वारीमध्ये मुलांसह शिक्षकांनीही वारकरी वेषात मनमुराद आनंद लुटला. वारीतील प्रत्येकाच्या चेहऱ्यावर विठूमाऊलीला भेटून आल्याचा आनंद ओसंडून वाहत होता. संस्थाध्यक्ष उमेश गाळवणकर, प्रा. चैताली बांदेकर यांच्या मार्गदर्शनाखाली प्रसाद कानडे आदींनी वारीचे आयोजन केले.