-rat५p३१.jpg-
२५N७५५३९
राजापूर ः आषाढी एकादशी व मोहरम सणाच्या पार्श्वभूमीवर पोलिस अधीक्षक नितीन बगाटे यांनी मिरवणूक मार्गाची पाहणी केली.
-----------------
आषाढी, मोहरम मिरवणुकीत अंतर ठेवा
पोलिस अधीक्षकांच्या सूचना ; राजापुरात मार्गाची पाहणी
सकाळ वृत्तसेवा
राजापूर, ता. ५ : आषाढी एकादशी आणि मोहरम सण एकाच दिवशी येत असल्याने हिंदू आणि मुस्लिम समाजबांधवांनी शांततेत साजरे करण्याच्या सूचना पोलिस अधीक्षक नितीन बगाटे यांनी दिल्या. आषाढी एकादशी दिंडी आणि मोहरम ताबूत मिरवणुकीच्या वेळा निश्चित करून मिरवणुकीमध्ये अंतर ठेवण्यात यावे, अशा सूचना पोलिस प्रशासनाच्यावतीने देण्यात आल्या आहेत.
हिंदू बांधवांचा आषाढी एकादशी उत्सव आणि मुस्लिम बांधवांचा मोहरम सण एकाच दिवशी येत असल्याच्या पार्श्वभूमीवर बगाटे यांनी दोन्ही समाजातील प्रमुख प्रतिनिधींची बैठक घेत सण शांततेत साजरे करण्याबाबत मार्गदर्शन केले. बगाटे यांनी दिंडी आणि ताबूत मिरवणूक मार्गाची दोन्ही समाजातील प्रतिनिधींसह पोलिस निरीक्षक अमित यादव यांच्यासमवेत पाहणी केली. बैठकीवेळी विठ्ठल मंदिर व्यवस्थापनाच्या वतीने संदीप मालपेकर, राजेंद्र कुशे, दीनानाथ कोळवणकर, जामा मशिद व्यवस्थापनाच्या वतीने अॅड. जमीर खलिफे, सुलतान ठाकूर, अप्पर पोलिस अधीक्षक जयश्री गायकवाड, उपविभागीय पोलिस अधिकारी नीलेश माईनकर, राजापूर पोलिस निरीक्षक अमित यादव उपस्थित होते.
आषाढी एकादशीनिमित्त राजापूर विठ्ठल मंदिर ते बाजारपेठ चिंचबांध भक्त पुंडलिक मंदिर अशी सवाद्य दिंडी काढली जाते. मोहरमनिमित्त ताबूत मिरवणूकही काढली जाते. त्या अनुषंगाने बगाटे यांनी उपविभागीय पोलिस अधिकारी रत्नागिरी पदभार लांजा उपविभाग नीलेश माईनकर, स्थानिक गुन्हे शाखा पोलिस निरीक्षक नितीन ढेरे, जिल्हा विशेष शाखा रत्नागिरी, विवेक पाटील तसेच राजापूर पोलिस ठाणे प्रभारी अधिकारी अमित यादव यांच्यासमवेत पायी चालत जाऊन मिरवणुकीच्या मार्गाची पाहणी केली. मिरवणूक काढण्यासाठी संबंधित विभागाच्या रीतसर परवानग्या घेण्याबाबत त्यांना सूचना दिल्या.