75703
75704

प्रतिपंढरपुरात भाविकांची तुडुंब गर्दी
पायी दिंडीचा सुवर्णमहोत्सव; दिवसभर भजनांचे सूर
सकाळ वृत्तसेवा
रत्नागिरी, ता. ६ : आषाढी एकादशीनिमित्त आज प्रतिपंढरपूर गणल्या गेलेल्या रत्नागिरीतील विठ्ठल मंदिरात भाविकांची तुडुंब गर्दी पाहायला मिळाली. विठ्ठल मंदिरात पहाटेपासून भाविकांची रिघ लागली. पावसाने विश्रांती घेतल्याने भाविकांची गर्दी झाली. दुपारनंतर पावसाच्या सरींनी हजेरी लावली. दिवसभर भजनांनी वातावरण भारून टाकले. कै. दाजीबा व कै. अप्पा नाचणकर प्रणित पायी दिंडीचा यंदा सुवर्णमहोत्सव साजरा झाला. या दिंडीत शेकडो लोकांनी भाग घेतला. शालेय विद्यार्थ्यांचीही गर्दी होती.
मंदिरात मध्यरात्री दीड वाजता विठुरायाच्या पूजेचा मान कै. दाजीबा नाचणकर यांचे नातू संतोष नाचणकर व कल्पना नाचणकर यांना मिळाला. पूजा, अभिषेक, नैवेद्य, महानैवेद्य, पहाटे काकडा आरती व दिवसभर भजने, प्रसाद वाटप अशा विविध कार्यक्रमांनी मंदिर गजबजून गेले. मंदिरात सकाळपासून भजनांचे आयोजन केले होते. श्री विठ्ठल मंदिर संस्था भजन मंडळ, केतन जोगळेकर, माउली भजन मंडळ, कदम बुवा, स्वानंद भजन मंडळ, उत्कर्ष भजन मंडळ, गोवेकर बुवा, दत्तप्रासादिक भजन मंडळ, अमेय पंडित, विठ्ठल-रखुमाई मित्रमंडळ यांची भजने रंगली. रात्री विठुरायाची पालखी बाजारपेठेत प्रदक्षिणेसाठी बाहेर पडली. त्यावेळीही भाविकांची गर्दी झाली.

चौकट
पायी दिंडीला प्रतिसाद
परटवणे येथील श्री भार्गवराम मंदिर येथून वाजत-गाजत आणि सुशोभित चित्ररथातून, ज्ञानोबा माऊलींच्या पादुकांची पालखी घेऊन दिंडी विठ्ठल मंदिरामध्ये आली. यामध्ये शेकडो भाविक सहभागी झाले. या दिंडीत शालेय विद्यार्थीही सहभागी झाले. पालखी, विठ्ठल-रुक्मिणीच्या वेशातील विद्यार्थी, संतमंडळी, पारंपरिक वेशभूषेत महिला, पुरुष सहभागी झाले. टाळ-मृदंगांच्या गजरात, विठुरायाचा गजर करत आणि भजने म्हणत दिंडी विठ्ठल मंदिरात पोहोचली.

कोट
दाजीबा नाचणकर व अप्पा नाचणकर संचालित पायी दिंडीचे ५० वे वर्ष आहे. सर्व समाजाने एकत्र यावे या हेतूने ही दिंडी सुरू झाली. आजही या दिंडीला समाजातून भरभरून प्रतिसाद मिळत असून यापुढेही दिंडी चांगल्या रितीने चालू राहील.
- राजू नेरकर