असलदे सोसायटीची सभासदांमुळे प्रगती

भगवान लोके ः तालुक्यात ३७ संस्थांमध्ये शंभर टक्के वसुली

कणकवली, ता. ७ : तालुक्यात श्री रामेश्वर विविध कार्यकारी सेवा सहकारी सोसायटी, असलदे या संस्थेच्या माध्यमातून गावातील शेतकऱ्यांच्या हिताच्या दृष्टीने पीक कर्ज, गृह कर्ज, शैक्षणिक कर्ज, घरदुरुस्ती कर्ज, लग्नकार्य कर्ज, शेती अवजारे कर्ज योजना सिंधुदुर्ग जिल्हा बॅंकेच्या सहकार्याने राबवण्यात येत आहे. कणकवली तालुक्यात ३७ विकास संस्थांमध्ये बॅंक स्तर व संस्था पातळीवर असलदे सोसायटी एकमेव पात्र ठरली आहे. शंभर टक्के कर्ज वसुलीत अव्वल ठरल्याने यशाचे सातत्य कायम राखण्यात यश आले आहे. शेतकरी सभासदांच्या सहकार्यामुळे संस्थेची प्रगती होत असल्याची माहिती चेअरमन भगवान लोके यांनी दिली आहे.
असलदे सोसायटीची मासिक सभा रामेश्वर सभागृहात चेअरमन भगवान लोके यांच्या अध्यक्षतेखाली झाली. व्हा.चेअरमन दयानंद हडकर, सरपंच चंद्रकांत डामरे, संचालक शत्रुघ्न डामरे, विठ्ठल खरात, श्यामराव परब, परशुराम परब, पत्रकार नरेंद्र हडकर, रघुनाथ लोके, विजय आचरेकर, सोसायटी सचिव अजय गोसावी, सत्यवान घाडी, प्रकाश वाळके, गौरी लोके आदी होते.
श्री. लोके म्हणाले, ‘संस्थेचा कर्ज व्यवहार ६८ लाखांवर पोहोचला आहे. संस्थेचे काम सातत्याने यशोशिखरावर पोहोचण्यासाठी संस्थेतील पदाधिकाऱ्यांचेही मोठे योगदान आहे. तसेच बॅंक तालुका विकास अधिकारी डी. आर. गवाणकर, विकास अधिकारी राजू सावंत, ए. के. सावंत, ए. बी. दळवी यांनी शंभर टक्के कर्ज वसुलीसाठी मार्गदर्शन केले आहे.’