कोमसापतर्फे २६ ला श्रावणधारा मनामनात
मालगुंडला आयोजन ः शाळा, महाविद्यालयीन विद्यार्थ्यांना उपयुक्त
सकाळ वृत्तसेवा
रत्नागिरी, ता. ८ : कोकण मराठी साहित्य परिषदेची मालगुंड शाखा, कवी केशवसुत स्मारक व्यवस्थापन समिती, केशवसुत सार्वजनिक वाचनालय व ग्रंथालय आणि युवाशक्ती शाखा यांच्या संयुक्त विद्यमाने श्रावणधारा मनामनात हा उपक्रम येत्या २६ रोजी मालगुंड येथे आयोजित केला आहे.
कोकण मराठी साहित्य परिषद शाखा मालगुंडतर्फे दरवर्षी या उपक्रमाचे आयोजन केले जाते. या माध्यमातून मालगुंड परिसरातील अनेक नव्याने लिहिणाऱ्या व कवितेच्या माध्यमातून आपल्या भावना व्यक्त करणाऱ्या साहित्यप्रेमींना संधी उपलब्ध करून देण्यात आली आहे. या उपक्रमात प्राथमिक, माध्यमिक शाळा, महाविद्यालये सहभागी होणार आहेत. या प्रत्येक शाळा, महाविद्यालयातून प्रत्येकी दोन विद्यार्थ्यांना सहभाग घेता येणार आहे. या वेळी शालेय गट आणि महाविद्यालयीन गटातील प्रत्येक स्पर्धकाने पाऊस या विषयावर मराठी भाषेत स्वतः लिहिलेली ३ ते ४ कडव्याची कविता, प्रस्तावना न करता सादर करायची आहे. या उपक्रमात सहभागी होणाऱ्या सर्व सहभागी कवींना प्रमाणपत्र आणि भेटवस्तू देऊन गौरवण्यात येणार असून, महत्त्वाचे म्हणजे उत्कृष्ट कविता सादर करणाऱ्या दोन कवींना कोकण मराठी साहित्य परिषदेच्या रत्नागिरी जिल्ह्याच्या विविध साहित्यिक उपक्रमात मान्यवर कवींच्या उपस्थितीत कविता सादर करण्याची संधी मिळणार आहे. या कार्यक्रमात सहभागी होऊ इच्छिणाऱ्या कवींनी शालेय गटासाठी शुभदा मुळ्ये, विलास राणे, उज्ज्वला बापट, महाविद्यालयीन गटासाठी अरुण मोर्ये तर खुल्या गटासाठी रामानंद लिमये व अमेय धोपटकर यांच्याशी संपर्क साधावा. या उपक्रमात सहभागी व्हा, असे आवाहन कोमसाप मालगुंड शाखेच्या अध्यक्षा नलिनी खेर, कवी केशवसुत स्मारक मालगुंडचे अध्यक्ष गजानन पाटील, कार्याध्यक्षा शुभदा मुळ्ये, सचिव विलास राणे, कोकण विभागप्रमुख अरुण मोर्ये, रामानंद लिमये यांनी केले आहे.

नवोदित कवींसाठी संधी
श्रावण महिन्याच्या पार्श्वभूमीवर, दरवर्षी कोमसाप मालगुंड शाखेतर्फे श्रावणधारा मनामनात हा उपक्रम घेण्यात येतो. या उपक्रमात अनेक कवींच्या रंगतदार मैफलींची गुंफण मनाला एक वेगळी ऊर्जा मिळवून देते. नवोदित कवींना या उपक्रमात एक वेगळा अनुभव घेण्याची संधी उपलब्ध होते. त्यामुळे या उपक्रमात शाळा, महाविद्यालयीन विद्यार्थी आणि खुल्या गटातील अधिकाधिक कवींनी सहभागी होणे गरजेचे आहे, असे कोमसाप शाखा मालगुंडचे सचिव विलास राणे यांनी सांगितले.