76296

सिंधुदुर्ग जिल्ह्यात ६३० रोपांची लागवड

धर्माधिकारी प्रतिष्ठानतर्फे देवगड, कणकवली, वैभववाडीत वृक्षारोपण

तळेरे, ता. ९ : डॉ. नानासाहेब धर्माधिकारी प्रतिष्ठानतर्फे राबविण्यात येण्याऱ्या विविध समाजोपयोगी उपक्रमांमुळे या प्रतिष्ठानचे कार्य जगभरात पोहोचले आहे. या उपक्रमामधील एक उपक्रम म्हणजे वृक्ष लागवड व संवर्धन आहे. महाराष्ट्रभूषण डॉ. नानासाहेब धर्माधिकारी यांच्या स्मरणार्थ वृक्ष लागवड व संवर्धन अभियान नुकतेच राबविले. यावेळी ६३० रोपांची लागवड केली.
धर्माधिकारी प्रतिष्ठान गेली अनेक वर्षे वृक्ष लागवड संवर्धन अभियान राबवून समाज प्रबोधन करत आहे. या मोहिमेअंतर्गत डॉ. नानासाहेब धर्माधिकारी यांच्या स्मरणार्थ सिंधुदुर्ग जिल्ह्यातील देवगड, कणकवली आणि वैभववाडी तालुक्यांतील एकूण सात ठिकाणी वृक्ष लागवड करण्यात आली. यामध्ये श्रीराम माध्यमिक विद्यामंदिर पडेल, तहलीसदार कार्यालय देवगड, शिरगाव हायस्कूल, दिर्बादेवी मंदिर सांगवे, नवीन कुर्ली वसाहत स्मशानभूमी, कासार्डे पी.एच.सी. ते कासार्डे तिठा दुतर्फा रस्ता आणि अरविंद सावंत माध्यमिक विद्यालय नाधवडे येथे एकूण ६३० वृक्षांची लागवडे करण्यात आली. यामध्ये १४ श्रीबैठकींतील ५३८ श्रीसदस्य सहभागी झाले. या झाडांचे ५ ते ६ वर्षे संवर्धन करून त्या विभागाकडे हस्तांतरित केले.
या झाडांसाठी लागणारे खत देखील श्रीगणेश विसर्जनादिवशी नदीपत्रात टाकले जाणारे निर्माल्य संकलन करून त्यावर प्रक्रिया करून बनविले जाते, जेणेकरून जलप्रदूषण होणार नाही व त्यापासून बनलेले कंपोस्ट खत वृक्ष वाढीसाठी उपयुक्त ठरेल. असे पर्यावरण पूरक उपक्रम राबवून प्रत्येकामध्ये सामाजिक बांधिलकीची जाणीव निर्माण करण्याचे काम डॉ.श्री.नानासाहेब धर्माधिकारी प्रतिष्ठानतर्फे केली जाते.