- rat९p१२.jpg-
२५N७६३८६
रत्नागिरी : कामगार कायद्यांविरोधात बुधवारी देशव्यापी संपावेळी शिवाजीनगर येथे ऑल इंडिया बॅंक एम्प्लॉईज असोसिएशनतर्फे निदर्शने करताना बॅंकिंग उद्योगातील कर्मचारी.
-------
रत्नागिरीत बॅंक कर्मचाऱ्यांची निदर्शने
कामगार कायद्यांविरोधात संप; दैनंदिन व्यवहारांवर परिणाम
सकाळ वृत्तसेवा
रत्नागिरी, ता. ९ : केंद्र सरकारच्या जनहितविरोधी व कामगारहित विरोधी धोरणांच्या विरोधात पुकारलेला देशव्यापी संप रत्नागिरी जिल्ह्यात यशस्वी झाल्याचा दावा आज बॅंकिंग उद्योगातील संघटनांनी केला आहे. देशभरात १० केंद्रीय कामगार संघटनांनी संपाची हाक दिली होती. रत्नागिरी शहरातील शिवाजीनगर येथे बॅंक ऑफ इंडियाच्या शाखेबाहेर बॅंक कर्मचाऱ्यांनी निदर्शने करून निषेध नोंदवला.
केंद्र सरकार चार नवीन कामगार कायदे करत आहे. त्याच्या संहितांना विरोध या प्रमुख मागण्यांसाठी हा देशव्यापी संप पुकारण्यात आला होता. बँकिंग उद्योगातील ऑल इंडिया बँक एम्प्लॉईज असोसिएशन ही अग्रणी संघटना संपामध्ये सामील झाली. या संपाचे व निदर्शनांचे नेतृत्व विनोद कदम, मनोज लिंगायत (बँक ऑफ इंडिया) व भाग्येश खरे (बँक ऑफ महाराष्ट्र), दीपक वैद्य (युनियन बँक ऑफ इंडिया), विजय होलम (कॅनरा बँक), अनिल पवार (फेडरल बँक) यांनी केले. सार्वजनिक बँकांचे सशक्तीकरण करा, सर्व खासगी बँकांचे राष्ट्रीयीकरण करा, बँकांमध्ये पुरेशा प्रमाणात नोकरभरती करा, सर्वसामान्य ठेवीवरील व बचतीवरील व्याजदरामध्ये वृद्धी करा, ग्राहकांवर लादण्यात येणारी विविध सेवाशुल्के रद्द करा, अशा विविध मागण्या केल्याची माहिती या वेळी संपकऱ्यांनी दिली. दरम्यान, संपामुळे आज दिवसभर बँकांचे कामकाज बंद राहिल्याने त्याचा परिणाम दैनंदिन व्यवहारांवर झाला.
----
चौकट
विरोधाची कारणे
नवीन कामगार कायदे लागू झाल्यास कोणत्याही क्षेत्रात, कारखान्यांमध्ये, उद्योगांमध्ये कामगार संघटना स्थापन करणे दुरापास्त होईल. संविधानाने दिलेला कामगारांचा संप करण्याचा हक्कदेखील पूर्णतः डावलण्यात येईल. सध्याचे किमान वेतन, सामाजिक सुरक्षितता, महिलांना मिळणाऱ्या खास सवलती या सर्व देखील या नवीन कायद्यामुळे संपुष्टात येण्याची भीती आहे. त्यामुळे कामगारांनी या कायद्यांना विरोध केला आहे.
-----
कोट
छोटे उद्योजक व शेतकरीवर्गासाठी कमीत कमी व्याजदराने कर्ज उपलब्ध करण्यात यावीत. थकीत कर्जांच्या वसुलीसाठी कठोर कायदे करावेत. हेतुपुरस्सर बँक कर्ज थकवणे हा फौजदारी गुन्हा समजण्यात यावा, या व अन्य विविध मागण्या ऑल इंडिया बॅंक एम्प्लॉईज संघटनेने केल्या आहेत.
- भाग्येश खरे, रत्नागिरी