76424
76417
स्थानिक ‘कागदी लिंबू’ संवर्धित होणार
कृषी विद्यापीठाची स्पर्धा; वाणात गुणधर्म आढळल्याने हालचाली
सकाळ वृत्तसेवा
वैभववाडी, ता. ९ ः डॉ. बाळासाहेब सावंत कृषी विद्यापीठाने आयोजित केलेल्या स्थानिक फळे आणि भाजीपाला स्पर्धेत कुडासे (ता. दोडामार्ग) येथील आकाश नरसुले या तरुण शेतकऱ्याच्या ‘कागदी लिंबू’ला प्रथम क्रमांक मिळाला. या वाणात चांगले गुणधर्म आढळल्याने ‘कागदी लिंबू’च्या स्थानिक वाणांचे संवर्धन आणि जतन करण्यासाठी हालचाली सुरू झाल्या आहेत.
डॉ. बाळासाहेब सावंत कोकण कृषी विद्यापीठाच्या ५३ व्या वर्धापन दिनानिमित्त १७ मे रोजी कोकणातील स्थानिक फळे व भाजीपाला स्पर्धेचे आयोजन केले होते. स्पर्धेत आकाश नरसुले यांच्या बागेतील स्थानिक ‘कागदी लिंबू’ला प्रथम क्रमांक मिळाला. कृषी दिनाच्या निमित्ताने १ जुलैला बक्षीस वितरण सोहळा झाला. या स्थानिक कागदी लिंबाच्या फळांमध्ये रसाचे प्रमाण ९० टक्के, एका झाडाची ७०० ते ८०० फळे देण्याची क्षमता, उत्तम चव आणि मोठ्या प्रमाणात असलेली मागणी या गोष्टी विद्यापीठाच्या निदर्शनास आल्या आहेत. त्यामुळे विद्यापीठाच्या उद्यानविद्या महाविद्यालय, दापोलीचे प्रमुख डॉ. महेश कुळकर्णी यांनी श्री. नरसुले यांना वाणांच्या नोंदणीबाबत प्रोत्साहित केले आहे. राष्ट्रीय स्तरावर ‘पीपीव्ही एफआरए’ नावाचा प्रकल्प सुरू आहे. या प्रकल्पांतर्गत स्थानिक वाणांची नोंदणी व जतन करण्याचे काम सुरू आहे. स्थानिक कागदी लिंबू वाणांचे जतन करण्यासाठी अर्ज करण्याची तयारी असल्यास त्यासाठी विद्यापीठ पातळीवरून सर्वतोपरी सहकार्य करण्याची तयारीही त्यांनी दर्शविली आहे.
................
शेतकरी नरसुलेंना सहकार्य करू ः नाईक
दरम्यान, याबाबत उद्यानविद्या महाविद्यालय, मुळदेचे (ता. कुडाळ) प्रा. हर्षद नाईक म्हणाले, ‘‘कागदी लिंबू या स्थानिक वाणांची फळे लहान असून, त्यामध्ये रसाचे प्रमाण ९० टक्के आहे. या झाडांमध्ये वर्षभर उत्पन्न देण्याची क्षमता आहे. त्यामुळे त्याचे संवर्धन होण्यासाठी शेतकरी नरसुले यांना पूर्णतः सहकार्य केले जाणार आहे.’’
--------
कोट
कागदी लिंबू ही स्थानिक जात आहे. प्रथम क्रमांक आल्यानंतर त्या वाणांच्या नोंदणीविषयी विद्यापीठाच्या अधिकाऱ्यांशी बोलणे झाले आहे. उद्यानविद्या कृषी महाविद्यालय, मुळदेचे प्रा. हर्षद नाईक यांनी नोंदणी अर्ज उपलब्ध करून दिला आहे. येत्या एक-दोन दिवसांत नोंदणीकरिता अर्ज भरणार आहे.
- आकाश नरसुले, विजेता शेतकरी, कुडासे (ता. दोडामार्ग)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.