पर्यटनस्थळांसाठी पाच कोटींचा निधी
सकाळ वृत्तसेवा
रत्नागिरी, ता. ९ : शासनाच्या ग्रामविकास विभागाने कोकण ग्रामीण पर्यटन विकास कार्यक्रमांतर्गत जिल्ह्यातील विविध समुद्रकिनाऱ्यांवर सेल्फ क्लिनिंग इलेक्ट्रॉनिक इको टॉयलेट आणि चेंजिंग रूम्स बांधण्यासाठी ५ कोटी रुपयांच्या निधीला प्रशासकीय मान्यता दिली आहे. पर्यटनवाढीच्यादृष्टीने शासनाने हे महत्त्वपूर्ण पाऊल उचलले आहे.
कोकणातील ग्रामीण भागातील भूमिपुत्रांना रोजगाराच्या संधी उपलब्ध करून देणे, विकासकामांना गती देणे आणि ग्रामीण पर्यटनाला चालना देण्यासाठी पायाभूत सुविधा निर्माण करणे हा या कोकण ग्रामीण पर्यटन विकास कार्यक्रम योजनेचा मुख्य उद्देश आहे. जिल्हाधिकारी तथा अध्यक्ष जिल्हास्तरीय कार्यकारिणी समिती, कोकण ग्रामीण पर्यटन विकास, रत्नागिरी यांनी विविध समुद्रकिनाऱ्यांवर सेल्फ क्लिनिंग इलेक्ट्रॉनिक इको टॉयलेट व चेंजिंग रूससाठी ५ कोटी रुपयांचा प्रस्ताव सादर केला होता. राज्यस्तरीय समितीच्या बैठकीत या प्रस्तावाला मंजुरी दिली आहे. या कामांसाठीचा निधी उपलब्ध तरतूद आणि इतर जिल्ह्यांची मागणी विचारात घेऊन टप्प्याटप्प्याने वितरित केला जाईल. जिल्हा परिषद मुख्य कार्यकारी अधिकाऱ्यांनी ही कामे इतर कोणत्याही योजनेतून घेतलेली नाहीत, याची खात्री करावी लागेल तसेच, अंदाजपत्रके तयार करणे, तांत्रिक मंजुरी, निविदा काढणे, स्वीकारणे, कार्यारंभ आदेश देणे आणि वस्तूंचा पुरवठा करताना शासनाच्या निविदा प्रक्रियेनुसार कार्यवाही करण्याची जबाबदारीही मुख्य कार्यकारी अधिकारी यांची राहणार आहे.