76769

प्रशासनाच्या अनुपस्थितीमुळे प्रश्‍न अनुत्तरीत

देवगडमधील ‘प्रधानमंत्री आवास’ बैठक; साळसकरांकडून लाभार्थ्यांना मार्गदर्शन

सकाळ वृत्तसेवा
देवगड, ता. १० : येथील देवगड जामसंडे नगरपंचायत कार्यक्षेत्रातील प्रधानमंत्री आवास योजना (शहरी) अंतर्गत मंजूर घरकुल योजना प्रकल्पाच्या अनुषंगाने संबंधित लाभार्थ्यांच्या बोलाविलेल्या बैठकीला प्रतिसाद लाभला. शिंदे शिवसेना पक्षाचे तालुकाप्रमुख विलास साळसकर यांनी लाभार्थ्यांना प्राथमिक मार्गदर्शन केले. याबाबत येत्या काही दिवसांत आणखी माहिती संकलित करून पुन्हा बैठक बोलावली जाईल, असेही त्यांनी यावेळी सांगितले. दरम्यान, बैठकीला नगरपंचायत प्रशासन प्रतिनिधी तसेच संबंधित विकासकांपैकी कोणीही उपस्थित नसल्याने लाभार्थ्यांना अधिक माहिती मिळू शकली नाही.
येथील देवगड जामसंडे नगरपंचायत कार्यक्षेत्रातील प्रधानमंत्री आवास योजना (शहरी) अंतर्गत मंजूर घरकुल योजना प्रकल्पाच्या अनुषंगाने संबंधित लाभार्थी व विकासक यांची संयुक्त बैठक येथे आयोजित केली होती. बैठकीसाठी शिवसेना तालुकाप्रमुख साळसकर यांनी केलेल्या आवाहनाला प्रतिसाद देऊन अनेक लाभार्थी उपस्थित होते. यामध्ये महिलांचाही सहभाग होता. मात्र, बैठकीला नगरपंचायत प्रशासन प्रतिनिधी तसेच विकासक प्रतिनिधींपैकी कोणीही उपस्थित नसल्याने लाभार्थ्यांना प्रकल्पाची सद्यस्थिती तसेच भविष्यातील हालचाली यांची अधिक माहिती मिळू शकली नाही. त्यामुळे लाभार्थी योजनेपासून वंचित राहणार का? असा प्रश्न यावेळी उपस्थित करण्यात आला. तथापि श्री. साळसकर यांनी अर्धवट स्थितीत रखडलेल्या प्रकल्पाचा प्राथमिक आढावा उपस्थितांसमोर मांडला. यातील तांत्रिक बाबी, उपलब्ध सदनिकांचा आकार, यातून मिळणारे अनुदान, त्यासाठी करावी लागणारी कर्ज उभारणी, त्यासाठी आवश्यक असणारी कागदपत्रे याची प्राथमिक माहिती दिली. संबंधित लाभार्थ्यांचे नुकसान होऊ नये, यासाठी आपली धडपड असल्याचे त्यांनी सांगितले.
------
पुन्हा बैठक घेणार ः साळसकर
यावेळी निकषात न बसलेल्या लाभार्थींना आगाऊ भरणा केलेली रक्कम व्याजासह परतफेड व्हावी, अशीही मागणी यावेळी करण्यात आली. दरम्यान, याबाबत येत्या काही दिवसांत आणखी माहिती संकलित करून पुन्हा बैठक बोलावली जाईल, असे श्री. साळसकर यांनी यावेळी सांगून बैठकीला उपस्थित राहण्याचे आवाहन केले.