77065

सावंतवाडीत अखिल भारतीय
विद्यार्थी परिषदेतर्फे गुणगौरव

सकाळ वृत्तसेवा
ओटवणे, ता. १२ ः अखिल भारतीय विद्यार्थी परिषद सावंतवाडी शाखेच्या वतीने शुक्रवारी (ता. ११) सावंतवाडी येथील श्री पंचम खेमराज महाविद्यालयाच्या प्रांगणात दहावी व बारावी उत्तीर्ण गुणवंत विद्यार्थ्यांचा सन्मान करण्यात आला. या कार्यक्रमात विद्यार्थ्यांना प्रशस्तीपत्र देऊन सन्मानित करण्यात आले.
कार्यक्रमाचे प्रमुख अतिथी म्हणून दोडामार्ग येथील आमदार दीपकभाई केसरकर महाविद्यालयाचे प्रा. सुदीप नाईक, विशेष उपस्थिती म्हणून अखिल भारतीय विद्यार्थी परिषद, रत्नागिरी विभागाचे संगठन मंत्री ओजस जयवंत, पंचम खेमराज महाविद्यालयाचे प्रभारी प्राचार्य डॉ. ठाकूर होते. सिंधुदुर्ग जिल्हा संयोजक विनीजी परब, जिगनासा कोकण प्रांत संयोजक स्नेहा धोते तसेच सावंतवाडी शहरप्रमुख ज्ञानेश्वर गवळी आदी मंचावर उपस्थित होते. या कार्यक्रमाला एकूण १४० विद्यार्थ्यांची उपस्थिती लाभली. गुणवंत विद्यार्थ्यांच्या सन्मानासोबतच त्यांना भविष्यातील शैक्षणिक वाटचालीसाठी प्रेरणा देणारे विचार मांडण्यात आले. अखिल भारतीय विद्यार्थी परिषद नेहमीच विद्यार्थ्यांच्या सर्वांगीण विकासासाठी कार्यरत असून, अशा उपक्रमांद्वारे त्यांच्या आत्मविश्वासात वाढ करण्याचे प्रयत्न आहेत, असे प्रतिपादन आयोजकांनी यावेळी केले.