करबुडे विद्यालयात
लोकसंख्या दिन
रत्नागिरी : करबुडे लाजुळ माध्यमिक विद्यालयात लोकसंख्या विस्फोट इशारा दिन साजरा करण्यात आला. शिक्षक अभिजित जोशी यांनी लोकसंख्यावाढीची कारणे, परिणाम आणि त्यावरील उपाय या विषयी मार्गदर्शन केले. अध्यक्षीय मनोगतात समाजातील लोकसंख्यावाढीचे समाजातील दुष्परिणाम या विषयी मार्गदर्शन केले. कार्यक्रमादरम्यान शिष्यवृत्ती परीक्षेत गुणवत्ता यादीत क्रमांक मिळवणारे वेदांत पाचकुडे आणि पार्थ पाचकुडे यांचा सत्कार करण्यात आला.

अनुलोम मित्रांनी केला
शिक्षकांचा गौरव
गुहागर ः अनुगामी लोकराज्य महाभियान या संस्थेच्या अनुलोम मित्रांनी गुरुपौर्णिमेच्या निमित्ताने शिक्षकांचा गौरव केला. या उपक्रमाचे नियोजन करताना आपल्या गुरूंचा सत्कार करण्याची संधी अनुलोम मित्रांनी शाळेतील विद्यार्थ्यांना दिली. काही शाळांमध्ये गुरूसन्मान कार्यक्रमाचे संपूर्ण नियोजन विद्यार्थ्यांनीच केले होते. गुहागर विधानसभा क्षेत्रातील १९ अनुलोम मित्रांच्या सहभागातून १५ गावातील १ आयटीआय, १३ माध्यमिक शाळा आणि २ जिल्हा परिषद शाळांमध्ये एकाच दिवशी १६ गुरूगौरव कार्यक्रम संपन्न झाले. यामध्ये पाथर्डी (जि. प. शाळा व अंगणवाडी), कोतळूक, देवघर, जामसूत, चोरवणे, मुंढर, गुहागर, वेलदूर, वीर (माध्यमिक विद्यालय व जि. प. शाळा), लवेल, रानवी, पोमेंडी (जि. प. शाळा व अंगणवाडी), देवघर, दहीवली, पालपेणे आणि मार्गताम्हाणे गावांचा समावेश होता. देवघर शाळेतील गुरूगौरव कार्यक्रमाचे नियोजन करताना विद्यार्थ्यांनी शिक्षकांची पाद्यपूजा केली. विद्यार्थ्यांनी शाळा परिसरात वृक्षारोपण करून पर्यावरणाचा संदेश दिला. मुंढरमधील सिद्धिविनायक विद्यामंदिरमधील विद्यार्थिनींनी शिक्षकांचे औक्षण केले. मार्गताम्हाणेमधील वसंतराव भागवत विद्यालयातील विद्यार्थ्यांनी गुरुपौर्णिमेनिमित्त एक नाटुकले सादर केले.

गुरुपौर्णिमा उत्सव
डीबीजेत साजरा
चिपळूण ः येथील डीबीजे कनिष्ठ महाविद्यालयाच्या राष्ट्रीय सेवा योजना विभागातर्फे गुरुपौर्णिमा उत्सव साजरा करण्यात आला. या वेळी साहित्यिक मंदार ओक यांचे मार्गदर्शनपर व्याख्यान आयोजित करण्यात आले होते. प्राचार्य माधव बापट यांच्या हस्ते ओक यांचा सन्मान करण्यात आला. या प्रसंगी मंदार ओक यांनी भारतात गुरुशिष्य परंपरेबाबत मार्गदर्शन केले.