एसटीला टेम्पोची धडक
सकाळ वृत्तसेवा
चिपळूण, ता. १२ ः मुंबई-गोवा महामार्गावरील सावर्डे बाजारपेठेत एसटी उभी असताना मागील बाजूस टेम्पोने जोरदार धडक दिली. शुक्रवारी दुपारी ३ वाजता ही घटना घडली. यामध्ये एक महाविद्यालयीन विद्यार्थिनी किरकोळ जखमी झाली असून, उपचारानंतर तिला घरी सोडण्यात आले.
दुर्गेवाडी चिपळूण ही बस सावर्डे बाजारपेठेत प्रवासी घेण्यासाठी थांबली असताना गोव्याहून मुंबईकडे जाणाऱ्या टेम्पोची एसटीच्या मागील बाजूस जोरदार धडक बसली. या वेळी सावर्डे येथे एसटीत शेवटच्या सीटवर बसलेल्या विद्यार्थिनीला जोरदार धक्का बसला. त्यामध्ये ती किरकोळ जखमी झाली. तातडीने तिला नजीकच्या रुग्णालयात नेण्यात आले; मात्र उपचारानंतर तिला घरी सोडण्यात आले. चालकाविरोधात सावर्डे पोलिस ठाण्यात बसचालक राजेशिर्के यांनी तक्रार दिली आहे. त्यानुसार चालक पाटील (पेण) याच्यावर शनिवारी गुन्हा दाखल केला आहे.