77384

‘फुगडी, फाग, घुमट वादन,
राधानृत्य कलेची दखल घ्या’

मानधन योजनेत समावेशाची मागणी

कणकवली, ता. १५ ः राज्य शासनाच्या सांस्कृतिक संचनालयामार्फत कलाकारांना दिल्या जाणाऱ्या मानधन योजनेत कोकणातील महिलांची पारंपरिक फुगडी आणि होलिकोत्सव सणातील फाग, घुमट वादन, राधा नृत्य कलांचा समावेश करून कलाकारांना मानधन देण्याची तरतूद शासन निर्णयात करावी, अशी मागणी लावण्यसिंधू लोककला व चित्रपट सहकारी संस्थेतर्फे राज्य शासनाकडे केली आहे.
लावण्यसिंधू लोककला आणि चित्रपट सहकारी संस्थेची कार्यकारी मंडळाची बैठक नुकतीच कणकवली येथील भवानी सभागृह येथे झाली. यावेळी संस्थेचे अध्यक्ष चंद्रशेखर उपरकर, उपाध्यक्षा अक्षता कांबळी, सचिव नितीन तळेकर, खजिनदार रविकिरण शिरवलकर, प्रांजल पराडकर, राजन तावडे, संतोष सावंत, गिरीश उपरकर आदी उपस्थित होते. शासनामार्फत गोंधळी, लोककलावंत, वादक, लावणी नृत्य कलाकार, दशावतारी नाट्य कलाकार, कीर्तनकार आदी कलाकारांना आणि कला पथकांना विविध योजनाद्वारे दरवर्षी मानधन दिले जाते. मात्र, अशा योजनांमध्ये कोकणातील महिलांच्या परंपरिक फुगडी आणि होळी सणातील फाग, घुमट वादन व राधा नृत्य अशा कलांचा समावेश शासन निर्णयात नसल्याने या कलांची जोपासना करणाऱ्या वृद्ध कलाकारांना मानधनापासून वंचित राहावे लागत आहे. कोकणातील विविध सांस्कृतिक मंडळानींही या मागणीचा पाठपुरावा करावा, असे आवाहन संस्थेने केले आहे.