swt146.jpg
77415
सावंतवाडी ः कार्यशाळेचे उद्घाटन करताना मधुसूदन मर्तल, विनायक गावस, जयप्रकाश सावंत, कौस्तुभ पेडणेकर, बाळकृष्ण पेडणेकर.

मनाच्या एकाग्रतेसाठी खेळ आवश्यक
मधुसुदन मर्तलः सावंतवाडीत ‘मुक्ताई’तर्फे कॅरम, बुध्दिबळाचे धडे
सकाळ वृत्तसेवा
सावंतवाडी, ता. १४ः मनाच्या एकाग्रतेसाठी मुलांनी लहान वयात कॅरम व बुद्धिबळ खेळ खेळणे आवश्यक आहे. मुलांनी गायन, नृत्य, अभिनय या कलाप्रकारांकडे वळावे, असे आवाहन जीएसटी कस्टम सुपरीटेंडंट मधुसुदन मर्तल यांनी येथे केले. ते मुक्ताई अॅकॅडमीतर्फे आयोजित कार्यशाळेत मार्गदर्शन करताना बोलत होते.
मुक्ताई ॲकॅडमीच्या वतीने येथील श्री पंचम खेमराज कॉलेज हॉलमध्ये विद्यार्थ्यांसाठी कॅरम आणि बुद्धिबळ कोचिंग कार्यशाळेचे आयोजन करण्यात आले. श्री. मर्तल (गोवा) यांच्यासह कार्यक्रमाचे अध्यक्ष, सिंधुदुर्ग जिल्हा शिक्षण प्रसारक मंडळाचे सदस्य जयप्रकाश सावंत, पत्रकार विनायक गावस, गोवा येथील जीएसटी कस्टम सुपरीटेंडंट मधुसुदन मर्तल यांच्या हस्ते आणि मुक्ताई ॲकॅडमीचे अध्यक्ष, कॅरम प्रशिक्षक कौस्तुभ पेडणेकर व बुद्धिबळ प्रशिक्षक बाळकृष्ण पेडणेकर यांच्या उपस्थितीत कार्यशाळेचे उद्घाटन करण्यात आले. सावंतवाडी, दोडामार्ग, वेंगुर्ले, कुडाळ, कणकवली येथील ४२ मुला-मुलींनी या कार्यशाळेत सहभाग घेतला.
विनायक गावस यांनी मुलांसाठी सेमिनार, वर्कशॉप आणि स्पर्धा यांचे दरवेळी आयोजन करून मुलांमध्ये आवड निर्माण करणाऱ्या मुक्ताई ॲकॅडमीचे कौतुक केले. बुद्धिबळ खेळातील माजी विश्वविजेता विश्वनाथन आनंद आणि विद्यमान विश्वविजेता डी. गुकेश यांच्या सोबत खेळलेल्या बाळकृष्ण पेडणेकर याने मुलांना बुद्धिबळाचे प्रशिक्षण दिले. जिल्ह्यातील ज्येष्ठ कॅरम खेळाडू, प्रशिक्षक कौस्तुभ पेडणेकर यांनी कॅरमचे प्रशिक्षण दिले. यावेळी ॲकॅडमीची तेरा वर्षीय राष्ट्रीय कॅरम खेळाडू साक्षी रामदूरकर हिचा सत्कार करण्यात आला. श्री. पेडणेकर यांनी पुढील महिन्यात कॅरम व बुद्धिबळ स्पर्धा घेण्यात येणार असल्याचे जाहीर केले. कार्यशाळेत सहभाग घेणाऱ्या विद्यार्थ्यांना प्रशस्तीपत्र देण्यात आली. ॲकॅडमीची राष्ट्रीय बुद्धिबळ खेळाडू गार्गी सावंत हिने आभार मानले.