swt१४२२.jpg
७७४७४
सिंधुदुर्गनगरीः पालकमंत्री नितेश राणे स्वच्छ सर्वेक्षण ॲपच्या माध्यमातुन स्वतः ऑनलाईन प्रतिक्रिया नोंदविली.

''स्वच्छ सर्वेक्षण''मधून प्रतिक्रिया नोंदवा
नितेश राणे ः जिल्हावासियांना आवाहन
सकाळ वृत्तसेवा
ओरोस, ता. १४ ः राज्याचे मत्स्यव्यवसाय व बंदरे तथा जिल्ह्याचे पालकमंत्री नितेश राणे यांनी स्वच्छ सर्वेक्षण ग्रामीण २०२५ अंतर्गत एसएसजी-२०२५ या ॲपच्या माध्यमातून स्वतः ऑनलाईन प्रतिक्रिया नोंदवून जिल्हावासियांना स्वच्छ सर्वेक्षण ग्रामीण २०२५ अंतर्गत प्रतिक्रिया नोंदविण्याबाबत आवाहन केले आहे.
केंद्राच्यावतीने २०१८ पासून स्वच्छ सर्वेक्षण ग्रामीण ही ग्रामपंचायतींची पडताळणी मोहीम सुरु केली आहे. या सर्वेक्षणातून ग्रामपंचायत, जिल्हा तसेच राज्यांमध्ये स्वच्छतेची स्पर्धा निर्माण करणे, स्वच्छतेची व्याप्ती वाढविणे तसेच स्वच्छ भारत मिशन ग्रामीण अंतर्गत ग्रामपंचायत स्तरावर बांधण्यात आलेल्या स्वच्छता सुविधांचा शाश्वत वापर करणे हा प्रमुख उद्देश आहे. राज्यातील ग्रामीण भागात अकॅडमी ऑफ मॅनेजमेंट स्टडीज या केंद्र पुरस्कृत त्रयस्थ यंत्रणेकडून गावांचे सर्वेक्षण करण्यात येणार आहे.
जिल्ह्यातील नमुना निवड पध्दतीने गावांची निवड करुन ॲपच्या माध्यमातून हे सर्वेक्षण केले जाणार आहे. यासाठी स्वच्छ सर्वेक्षण ग्रामीण २०२५ हे ॲप जिल्हा परिषद सिंधुदुर्गच्या संकेतस्थळावर प्रसिध्द केले आहे. स्वच्छ सर्वेक्षण ग्रामीण २०२२ मध्ये आपल्या जिल्ह्याला पश्चिम भारतात दुसरा क्रमांक प्राप्त झाला होता. हा आलेख चढता राहण्याकरीता जिल्हावासियांनी गुगल प्ले स्टोअरवरुन हे ॲप डाऊनलोड करुन प्रतिक्रिया नोंदविणे गरजेचे आहे. यासाठी पालकमंत्री राणे यांनी स्वतः अॅपद्वारे ऑनलाईन नोंदणी केली आहे. तसेच जिल्ह्यातील नागरिकांनी अॅप डाऊनलोड करून जास्तीतजास्त नोंदणी करावी, असे आवाहन जिल्हाधिकारी अनिल पाटील, मुख्य कार्यकारी अधिकारी रविंद्र खेबुडकर यांनी जिल्हावासियांना जाहीर केले आहे.