77800

‘करिअर संसदे’च्या मुख्यमंत्रिपदी परब

कट्टा येथे डॉ. वराडकर महाविद्यालयात पदग्रहण

सकाळ वृत्तसेवा
मालवण, ता. १६ : जागतिक युवा कौशल्य दिनाचे औचित्य साधून कट्टा येथील डॉ. दादासाहेब वराडकर कला व वाणिज्य महाविद्यालयात ‘करिअर कट्टा’च्या ‘करिअर संसदे’चा पदग्रहण समारंभ पार पडला. मुख्यमंत्रिपदी प्राची परब या विद्यार्थिनीची निवड करण्यात आली.
महाराष्ट्र राज्य उच्च व तंत्र शिक्षण विभाग आणि महाराष्ट्र माहिती-तंत्रज्ञान सहाय्यता केंद्राच्या संयुक्त विद्यमाने कट्टा पंचक्रोशी शिक्षण प्रसारक मंडळ संचलित डॉ. दादासाहेब वराडकर कला व वाणिज्य महाविद्यालयात करिअर कट्टा विभाग कार्यरत आहे. या अनुषंगाने जागतिक युवा कौशल्य दिनानिमित्त करिअर कट्टा विभागांतर्गत ‘करिअर संसदे’च्या नवनियुक्त पदाधिकाऱ्यांचा शपथ ग्रहण समारंभ प्राचार्य ध्वजेंद मिराशी यांच्या अध्यक्षतेखाली झाला. या संसदेत पदाधिकाऱ्यांची नियुक्ती केली. यामध्ये संचिता करावडे (नियोजन मंत्री), ऐश्वर्या परब (कायदे व शिस्तपालन), साहिल पालव (सामान्य प्रशासन), पूजा लाड (माहिती प्रसारण), राजकुमार लोखंडे (उद्योजकता विकास), ओम टेमकर (रोजगार स्वयंरोजगार), भक्ती घाडी (कौशल्य विकास), सलोनी पवार (संसदीय कामकाज), साक्षी पालव (महिला व बालकल्याण), हर्ष पेडणेकर (सदस्य). नवनियुक्त पदाधिकाऱ्यांना प्रा. मिराशी व उपप्राचार्य प्रा. रवींद्र गावडे यांच्या हस्ते करिअर कट्टा डायरी, बॅज व प्रमाणपत्र देऊन गौरविले.