...तर त्या आव्हानावर मात करू शकतो!
डॉ. अनिरुद्ध आठल्ये ः लोकसंख्या दिनानिमित्त रत्नागिरीत जनजागृती
सकाळ वृत्तसेवा
रत्नागिरी, ता. १६ ः वाढती लोकसंख्या ही केवळ आकड्यांची समस्या नाही, तर ही मानवतेच्या गुणवत्तेची परीक्षा आहे. आरोग्य सेवा, शिक्षण, व जागरूकता हे तीन मुख्य स्तंभ या समस्येच्या उपाययोजनेसाठी महत्त्वाचे आहेत. शासन, स्वयंसेवी संस्था आणि नागरिक यांनी एकत्र येऊन जबाबदारीने कृती केली, तर त्या आव्हानावर नक्कीच मात करू शकतो, असे प्रतिपादन जिल्हा आरोग्य अधिकारी डॉ. अनिरुद्ध आठल्ये यांनी केले.
जागतिक लोकसंख्या दिनानिमित्त रत्नागिरीत आयोजित जनजागृतीपर कार्यक्रमांविषयी माहिती देताना ते बोलत होते. केंद्र शासनाच्या सूचनेनुसार तसेच मुख्य कार्यकारी अधिकारी वैदेही रानडे यांच्या मार्गदर्शनाखाली जिल्ह्यात जागतिक लोकसंख्या दिनानिमित्त विविध जनजागृतीपर कार्यक्रम आयोजित करण्यात आलेले आहेत. जागतिक लोकसंख्या दिन सप्ताहाला ११ पासून सुरुवात झाली असून १८ जुलैपर्यंत हे कार्यक्रम आयोजित केले जाणार आहेत. नियोजित पालकत्वासाठी आरोग्यदायी वेळ आणि गर्भधारणेमधील अंतर असे यंदाच्या लोकसंख्या दिनाचे शीर्षक (थीम) आहे. तसेच आई होण्यासाठी योग्य वय तेव्हा, शरीर व मनाची तयारी जेव्हा असे घोषवाक्य निश्चित केलेले आहे. रत्नागिरी जिल्ह्यात लोकसंख्या सप्ताहानिमित्त आरोग्य विभागामार्फत विविध उपक्रमांद्वारे शासकीय रुग्णालयांमध्ये कुटुंब नियोजन नसबंदी शस्त्रक्रिया शिबिर, कुटुंब नियोजन जनजागृती रॅली, प्राथमिक आरोग्य केंद्र व उपकेंद्रांवर कुटुंब नियोजन साधनांचे मोफत वितरण तसेच शाळा, महाविद्यालयांमध्ये जनजागृती व्याख्याने, आशा व आरोग्यसेवक-सेविकांमार्फत घरोघरी माहिती देणे, वैद्यकीय अधिकाऱ्यांमार्फत मुलांमध्ये लैंगिक शिक्षण व सुरक्षित आरोग्यावरील मार्गदर्शन सत्रे, विविध समाजमाध्यमाद्वारे जनजागृती करण्यात येत आहे. या अभियानाचा उद्देश जनतेत लोकसंख्या नियंत्रण, कुटुंब नियोजन, महिलांचे आरोग्य व हक्क याबद्दल जागरूकता निर्माण करणे हा आहे.