swt166.jpg
77876
साळगावः रानभाजी प्रदर्शनाची पाहणी करताना प्रा. यशोधन गवस, प्रवीण प्रभूकेळुसकर, प्रा. अमेय महाजन आदी.

रानभाजी प्रदर्शनातून पोषणमूल्यांची जागृती
साळगावातील उपक्रमः ‘हॉटेल मॅनेजमेंट’ महाविद्यालयाचा पुढाकार
सकाळ वृत्तसेवा
सावंतवाडी, ता. १६ः कॉलेज ऑफ सायन्स हॉटेल मॅनेजमेंट साळगाव येथे रानभाजी प्रदर्शन व पाककला स्पर्धेचे आयोजन करण्यात आले. नैसर्गिक व पारंपरिक अन्नघटकांबाबत विद्यार्थ्यांमध्ये जागृती निर्माण व्हावी तसेच रानभाज्यांचे आरोग्यदायी महत्त्व अधोरेखित व्हावे, या उद्देशाने हा उपक्रम राबविण्यात आला.
या कार्यक्रमास देशभक्त शंकरराव गव्हाणकर महाविद्यालय, सावंतवाडीचे प्राचार्य यशोधन गवस, लोकमान्य एज्युकेशनचे सीनियर एक्झिक्युटिव्ह प्रवीण प्रभूकेळुसकर, प्रा. अमेय महाजन आदी मान्यवर उपस्थित होते. कार्यक्रमात विद्यार्थ्यांनी रानभाज्यांपासून तयार केलेले मशरूम बर्गर, अळू मंच्युरियन, बांबू फ्राय, सुरण बिर्याणी, शेगलाचे पराठे, भारंगी कटलेट, टाकळ्याची भाकरी अशा चविष्ट व नावीन्यपूर्ण पदार्थांची मेजवानी सादर केली. आधुनिक फास्ट फूडच्या युगातही नैसर्गिक व पारंपरिक अन्नाचे महत्त्व अधोरेखित करत त्यांनी या पाककृती सादर केल्या. प्रा. गवस सरांनी विद्यार्थ्यांचे कौतुक करताना, पिझ्झा-बर्गरच्या जमान्यात रानभाज्यांचा वापर करून असे नावीन्यपूर्ण पदार्थ तयार करणे ही निश्चितच प्रशंसनीय गोष्ट आहे, असे गौरवोद्गार काढले. या भाज्यांचे आयुर्वेदात महत्त्व असून त्या दुर्मीळ होत चालल्या आहेत. त्यामुळे ही परंपरा पुढील पिढीकडे पोहोचविणे आवश्यक आहे, असे मत प्रभूकेळुसकर यांनी व्यक्त केले.
प्रदर्शनामध्ये टाकळा, अळू, पेवगा, कुर्डू, फोडशी, अळंबी, भारंगी, सुरण, बांबूचे कोंब, घोळ आदी रानभाज्यांचे शास्त्रीय माहितीपत्रक व त्यांच्या आयुर्वेदिक गुणधर्मांची माहिती सादर करण्यात आली. या स्पर्धेचे परीक्षण प्रभूकेळुस्कर, प्रा. गवस व ऋषिकेश सूर्याजी यांनी केले. पारंपरिकतेला आधुनिकतेची जोड देत विद्यार्थ्यांना प्रात्यक्षिक अनुभव देण्याचा उपक्रम जयहिंद कॉलेज ऑफ सायन्स, साळगाव सातत्याने राबवत असून, या उपक्रमामुळे विद्यार्थ्यांमध्ये पर्यावरणजाणीव, पोषणमूल्यांची समज आणि सांस्कृतिक अभिमान वाढीस लागेल, असा विश्वास आयोजकांनी व्यक्त केला.