77913

कलाकौशल्यास व्यावसायिक रूप द्यावे

भूषण मेतर; मालवण भंडारी हायस्कूलमध्ये वस्तू प्रदर्शन

सकाळ वृत्तसेवा
मालवण, ता. १६ : मुलांनी अभ्यासासह आपल्यातील गुण, विशेष कौशल्य व कला ओळखून ते जोपासावेत. आपल्यातील कला कौशल्ये केवळ छंद म्हणून न जोपासता ती विकसित करून त्याला व्यावसायिक रूप देऊन प्रगती साधावी, असे प्रतिपादन करवंटी कलाकार भूषण मेतर यांनी येथे केले.
येथील भंडारी ए. सो. हायस्कूलमध्ये जागतिक युवा कौशल्य दिन साजरा झाला. यानिमित्त प्रशालेतील मल्टी स्किल फाउंडेशन कोर्स विभागाच्या विद्यार्थ्यांनी आपल्या कौशल्यातून बनविलेल्या विविध वस्तूंच्या प्रदर्शनाचे उद्‍घाटन प्रशालेचे माजी विद्यार्थी, करवंटी कलाकार मेतर यांच्या हस्ते झाले. यावेळी कार्यक्रमाचे अध्यक्ष भंडारी एज्युकेशन सोसायटीचे मुख्य कार्यकारी अधिकारी वामन खोत, मुख्याध्यापक हणमंत तिवले, मल्टी स्किल फाउंडेशन कोर्स विषयाचे ऊर्जा पर्यावरण विभागाचे निदेशक केशव भोगले, अभियांत्रिकी विभागाचे जगन्नाथ आंगणे, शेती पशुपालन विभागाच्या नेहा गवंडे, गृह आरोग्य विभागाच्या दर्शना मयेकर, ग्रंथपाल प्रफुल्ल देसाई आदी उपस्थित होते.
केशव भोगले यांनी युवा कौशल्य दिनाचे महत्त्व सांगितले. दर्शना मयेकर यांनी उपक्रमांची माहिती दिली. खोत यांनी, मुलांमधील कला कौशल्यांना शालेय जीवनातच चालना दिली पाहिजे, तरच ती भविष्यात वृद्धिंगत होतील, याच दृष्टीने भंडारी हायस्कूलमध्ये कला, कौशल्यावर आधारित कोर्सचे शिक्षण देण्यात येत आहे. मुलांनी ते शिकून स्वतःची प्रगती करून घ्यावी. भविष्यात उद्योजक, व्यावसायिक बनावे, असे सांगितले.
मेतर यांनी करवंटीसारख्या टाकाऊ वस्तूपासून बनविता येणाऱ्या विविध वापरायोग्य व शोभेच्या पर्यावरणपूरक वस्तूंविषयी माहिती देतानाच या वस्तूंना असलेली मागणी, त्यातील व्यावसायिक संधी याबाबत मार्गदर्शन केले. करवंटी वस्तू बनविण्याचे प्रात्यक्षिकही त्यांनी मुलांना दाखविले. जगन्नाथ आंगणे यांनी सूत्रसंचालन केले. विद्यार्थी ध्रुव गोलतकर याने आभार मानले.