भीती सोडा, पोलिसांना मित्र समजा
बाबूराव महामुनी ः संगमेश्वरात शांतता कमिटी बैठक
सकाळ वृत्तसेवा
संगमेश्वर, ता. १६ ः येथे कायद्याचे काम करणारे लोक आहेत. त्यामुळे सर्वसामान्य नागरिकांनी पोलिसांबद्दल भीती न ठेवता त्यांना आपले मित्र समजले पाहिजे, असे प्रतिपादन अप्पर पोलिस अधीक्षक बाबूराव महामुनी केले आहे.
संगमेश्वर पोलिस ठाण्यात शांतता कमिटीची बैठक आयोजित करण्यात आली. त्यावेळी ते बोलत होते. श्री. महामुनी म्हणाले, गुन्हेगारांना कायद्याचा धाक राहिला पाहिजे आणि आमचा प्रयत्न नेहमी न्याय देण्याचा राहणार आहे. कायदेशीर मार्गाने, जनतेच्या समस्या ऐकून, सकारात्मक भूमिका घेणे ही आमची जबाबदारी आहे. जातीय तणाव पसरवणाऱ्यांवर कठोर कारवाई केली जाईल. समस्या बिनधास्त मांडा, आम्ही कायद्याच्या चौकटीत राहून चांगले काम करू.
बैठकीला उपविभागीय पोलिस अधिकारी नीलेश माईनकर, पोलिस निरीक्षक राजाराम चव्हाण, स्थानिक शांतता कमिटीचे सदस्य उपस्थित होते. संगमेश्वर व्यापारी संघटना आणि इतर संघटना यांच्या वतीने बाबूराव महामुनी यांचे स्वागत करण्यात आले.