77982

उद्योजक होऊन रोजगार निर्माण करा

जिल्‍हाधिकारी पाटील; ‘एमआयटीएम’मध्ये युवा कौशल्‍य दिन

कणकवली, ता. १६ : एआय तंत्रज्ञानामुळे विविध क्षेत्रातील नोकऱ्या धोक्‍यात येत आहेत. अशा स्थितीत रोजगाराच्या संधी शोधण्यापेक्षा स्वतः उद्योजक होऊन रोजगार निर्माण करा, असे आवाहन जिल्‍हाधिकारी अनिल पाटील यांनी केले.
सुकळवाड येथील जयवंती बाबू फाउंडेशन संचलित एम.आय.टी.एम अभियांत्रिकी महाविद्यालयात युवा कौशल्‍य दिन कार्यक्रम झाला. जिल्हा कौशल्य विकास, रोजगार व उ‌द्योजकता मार्गदर्शन केंद्राच्या संयुक्त विद्यमाने हा कार्यक्रम झाला. यात श्री.पाटील यांनी प्रमुख मार्गदर्शन केले.
जिल्हा उद्योग केंद्राचे व्यवस्थापक रवींद्र पत्की यांनी जिल्ह्यातील विविध शेतीपूरक उद्योग आणि योजनांबाबत माहिती दिली. नारळ, काजू, कोकम आदी स्थानिक उत्पादकांवर आधारित उद्योगांची माहिती देत त्यांनी तांत्रिक शेतीची गरज अधोरेखित केली.
जिल्हा कौशल्य विकास अधिकारी सुरज देबाजे यांनी मुख्यमंत्री युवा योजना, दीनदयाळ उपाध्याय योजना आदी योजनांची माहिती दिली. संस्थेचे विश्वस्त विनोद कदम यांनी अभियांत्रिकी शिक्षणाचा उपयोग पर्यटन व औद्योगिक विकासासाठी करण्याचे आवाहन केले. प्राचार्य डॉ.एस.व्ही ढणाल यांनी जागतिक युवा कौशल्य दिनाचे महत्त्व स्पष्ट करत स्किलिंग इंडिया आणि डिजिटल युगाच्या संधींबाबत मार्गदर्शन केले. युवा वि‌द्यार्थ्यांमार्फत एम.आय.टी.एम. कॉलेजच्या ऐश्वर्या पालव, दर्पण गावडे या विद्यार्थ्यांनी युवा कौशल्य कार्यक्रमाबद्दल मनोगत व्यक्त केले. संस्थेचे विश्वस्त संतोष पाल, नेहा पाल, संचालक केतन कदम यांनीही शुभेच्छा दिल्‍या. अमित तडवी यांनी आभार मानले.