swt1629.jpg
77991
बांदाः व्ही. एन. नाबर मेमोरियल इंग्लिश मीडियम स्कूलमध्ये कौशल्य विकास दिन कार्यक्रमास उपस्थित मान्यवर.

स्वतःचे कौशल्य ओळखून प्रयत्न करा
भिकाजी धुरीः बांदा नाबर स्कूलमध्ये कौशल्य विकास दिन
सकाळ वृत्तसेवा
बांदा, ता. १६ः विद्यार्थ्यांच्या अंगी असणारे कौशल्य प्रत्येक विद्यार्थ्यांनी स्वतः ओळखून त्या दृष्टीकोनातून प्रयत्न केल्यास नक्कीच यश मिळेल, असे प्रतिपादन माजी मुख्याध्यापक भिकाजी धुरी यांनी व्ही. एन. नाबर इंग्लिश मीडियम स्कूलमध्ये आयोजित कौशल्य विकास दिन कार्यक्रमात केले.
यावेळी व्यासपीठावर बांदा उपसरपंच राजाराम धारगळकर, उद्योजक संजय शिरोडकर, शंकर उर्फ भाऊ वळंजू, नारायण पित्रे, शिक्षक-पालक संघाचे उपाध्यक्ष दिवाकर म्हावळणकर, मुख्याध्यापिका मनाली देसाई, सांस्कृतिक विभाग प्रमुख प्रतीक्षा शिरोडकर, माजी विद्यार्थी साहिल बांदेकर आदी उपस्थित होते.
सावंतवाडी तालुक्यात फक्त नाबर प्रशालेमध्ये ‘एमएसएटी’सारखा कौशल्य विकास विषय शिकविला जात आहे. या प्रशाळेतील विद्यार्थ्यांनी या संधीचा फायदा घेत भविष्यात उंच भरारी घ्यावी व आपल्यासह शाळेचेही नाव उज्ज्वल करावे, असे आवाहन धुरी यांनी केले. मुख्याध्यापिका देसाई यांनी कौशल्य विकास दिनाच्या विद्यार्थ्यांना शुभेच्छा देत कौशल्य विकास या विषयासंदर्भात मार्गदर्शन केले. सामील देसाई यांनी, मला एमएसएटी विषयाचा महाविद्यालय शिक्षणात खूप उपयोग झाला. एकविसाव्या शतकाकडे झेपावताना तंत्रज्ञानाचा वापर मोठ्या प्रमाणात होत आहे. हे तंत्रशिक्षण भविष्यात तुम्हालाही खूप उपयुक्त असेल, असे स्पष्ट केले.
यावेळी निबंध स्पर्धा व पोस्टर स्पर्धेच्या प्रथम तीन क्रमांकांना बक्षीस वितरण मान्यवरांच्या हस्ते करण्यात आले. प्रास्ताविक निदेशक भूषण सावंत यांनी, सूत्रसंचालन समन्वयक राकेश परब यांनी केले. आभार निदेशिका गायत्री देसाई यांनी मानले. यावेळी संकेत वेंगुर्लेकर, निदेशिका रिया देसाई उपस्थित होते.