तज्ज्ञांनी प्रश्न सोडविण्यासाठी पुढे यावे
कोकण विकास परिषद ; स्वायत्त समिती स्थापण्याचा निर्णय
सकाळ वृत्तसेवा
खेड, ता. १७ : मुंबईतील नरिमन पॉइंट येथील यशवंतराव चव्हाण सेंटरमध्ये झालेल्या कोकण विकास चिंतन परिषद कोकणातील २०० जणांनी सहभाग नोंदवला. कोकणातील तज्ज्ञांनी विविध प्रश्नांचे प्रभावी निराकरण करण्यासाठी लोकप्रतिनिधी आणि मंत्र्यांना मदत केली पाहिजे, असे समितीमार्फत या परिषदेत मांडण्यात आले.
नरिमन पॉइंट येथील सभागृहात झालेल्या परिषदेला उद्योगमंत्री उदय सामंत, फलोद्यानमंत्री भरत गोगावले उपस्थित होते. या परिषदेमध्ये शेती, पर्यटन, मत्स्य प्रक्रिया, फलोद्यान, पाणी व्यवस्थापन, पायाभूत सुविधा अशा कोकणच्या भवितव्यासाठी महत्त्वाच्या विषयांचा आढावा घेण्यात आला. कोकणची अर्थव्यवस्थेला बूस्टर देण्यासाठी महत्त्वाच्या व्यावसायांना बळ देणे गरजेचे आहे. शासनाच्या विविध विभागामार्फत कोकणात विविध प्रकल्प राबवण्यात येत आहेत. त्यावर चर्चा परिषदेमध्ये चर्चा करण्यात आली. उपस्थितांना या प्रकल्पांविषयी थोडक्यात माहितीही दिली गेली. कोकणच्या प्रश्नांवर दरवर्षी एकत्र येऊन चिंतन केले, तर त्यावर योग्यवेळी सकारात्मक निर्णय घेणे शक्य आहे. त्यासाठी ''स्वायत्त कोकण विकास समिती'' स्थापन करण्याचा निर्णय यावेळी घेण्यात आला. त्यामध्ये विविध व्यवसायातील तज्ज्ञ लोकांना सहभागी करुन घेण्यात येणार आहे. याप्रसंगी मुख्य संयोजक संजय यादवराव, खासदार धैर्यशील पाटील, आमदार प्रसाद लाड, माजी आमदार चंद्रकांत मोकल यांच्यासह अधिकारी उपस्थित होते.